Sánchez non tocará a amnistía, pero non descarta reformar a Lei de axuizamento criminal

O presidente do Goberno, Pedro Sánchez, está convencido de que se aprobará a lei de amnistía e negociará para iso con Junts, e aínda que non prevé cambiar o texto rexeitado polo pleno do Congreso non descarta unha modificación da Lei de axuizamento criminal.

Sánchez referiuse á negociación que se abre agora na comisión de Xustiza do Congreso para tentar sacar adiante a lei nunha entrevista na Sexta na que cualificou de "inviable" un referendo de autodeterminación en Cataluña.

"Estou convencido de que esta lei de amnistía vai saír e vai ser plenamente constitucional", subliñou o xefe do Executivo, quen asegurou que non se vai ampliar a amnistía a todos os delitos de terrorismo tal e como pide a formación de Carles Puigdemont.

Aínda que non prevé cambiar o texto da lei, dixo que entre todos tense que atopar unha solución, e non pechou a porta a unha reforma da Lei de axuizamento criminal que podería poñer un límite ao tempo de instrución xudicial.

Ao ser preguntado por iso sinalou: "Eu creo que hai un elemento que vimos durante estas últimas semanas, de instrucións que se prolongan e que os propios fiscais puxeron en cuestión. Son elementos que se incardinan perfectamente nunha reforma que validamos nos reais decretos leis de hai unhas semanas no Congreso e é o da eficiencia da xustiza".

"Creo que hai elementos que podemos incorporar de mellora e que evidentemente poden emendar algunhas das dúbidas que poidan ter estas formacións políticas", engadiu. 

O fiscal non ve indicios de criminalidade contra Puigdemont no caso Tsunami

O fiscal do Tribunal Supremo cre que non hai terrorismo nin concorren indicios racionais de criminalidade contra o expresidente catalán Carles Puigdemont, polo que solicita devolver a causa de Tsunami Democràtic ao xuíz da Audiencia Nacional para que continúe a instrución.

No seu escrito, o fiscal repasa as accións de Tsunami como o bloqueo do aeroporto do Prat e conclúe que para que eses feitos sexan cualificados de terrorismo debe producirse un delito grave contra a liberdade, o que entende que non ocorreu.

Ademais, sostén que os indicios tidos en conta polo instrutor Manuel García-Castellón "resultan demasiado abertos, para poderse afirmar que concorre a situación procesual que permitiría, razoablemente, que o Tribunal Supremo asumise a competencia".