Sánchez defende as medidas anticrise coa tranquilidade de ter o Si de Junts

O presidente do Goberno Pedro Sánchez comparecerá este mércores ante o pleno do Congreso para defender as medidas do real decreto lei de resposta aos efectos da guerra de Irán, que será validado este xoves polo pleno da cámara ao asegurar o Executivo o voto favorable de Junts.

Sánchez pediu comparecer no Congreso ante a situación provocada polo ataque dos Estados Unidos e Israel a Irán, unha comparecencia que pedira tamén o Partido Popular. Despois de que nunha reunión extraordinaria o Consello de Ministros aprobase o pasado venres o real decreto co plan anticrise, as súas medidas xa están en vigor desde o pasado domingo pero teñen que ser validadas polo Congreso.

Ese plan conta cunha dotación de 5.000 millóns de euros e inclúe rebaixas de impostos á electricidade, ao gas e aos carburantes (do 21 % de IVE ao 10 %), e tamén descontos para colectivos vulnerables e axudas directas para os sectores máis afectados. Para que todas elas poidan contar co máximo apoio, o xefe do Executivo pedirá responsabilidade ao resto de grupos.

Coa incógnita aínda de que fará o Partido Popular, cuxo líder Alberto Núñez Feijóo pediu onte ao Goberno que aprazase a votación do decreto para negociar que inclúa outras medidas que expón o seu partido, o voto de Junts volvía ser unha vez máis clave para saber se a iniciativa sería validada. Pero esta dúbida quedou despexada este martes despois de que a súa voceira no Congreso Miriam Nogueras vinculase ese apoio a que o Executivo apoiase a esixencia da súa formación de aplicar a directiva europea que permite eximir do IVE os autónomos que facturen menos de 85.000 euros anuais.

Tras as negociacións, Junts dá por feito xa que o Goberno acepta esa proposta e, en consecuencia, o partido de Carles Puigdemont apoiará o decreto. O apoio permitirá a Sánchez facer presión no PP na súa apelación a que non quede só xunto a Vox rexeitando as medidas anticrise.

Máis aló desa petición de apoio, o presidente do Goberno fará unha análise da situación provocada pola guerra en Irán, insistindo en que considera fóra do dereito internacional a acción dos Estados Unidos e Israel contra a República Islámica. Tal e como veu asegurando, reiterará que se trata dun dos momentos máis graves aos que España tivo que facer fronte nos últimos anos, e defenderá a posición que mantivo o Executivo desde o ataque e á que o Goberno considera que se foron sumando de forma paulatina cada vez máis países.