Pedro Sánchez di que en Cataluña gañou a súa aposta pola convivencia
Pedro Sánchez di que en Cataluña gañou a súa aposta pola convivencia
O líder do PSOE critica o acto de Vox co presidente arxentino Javier Milei
Sinalou que o mércores anunciará o recoñecemento do Estado palestino
Explicou que a proposta de Teresa Ribera para as europeas é a contraria á da "internacional ultradereitista"
Pedro Sánchez celebrou na cidade condal os resultados nos comicios cataláns da man de Salvador Illa e a candidata ás europeas, Teresa Ribera. Para Illa ábrese un tempo de unidade dos cataláns dentro da España plural e diversa.
"Benvidos a unha Cataluña que abriu unha nova etapa", proclamou Illa entre o entusiasmo dun auditorio en pé.
Pedro Sánchez considera que tiña razón ao defender para Cataluña "o perdón fronte ao rancor e a convivencia fronte á confrontación", e estableceu un contraste coas posicións de Feijóo e Abascal.
"Feijóo e Abascal miran ao pasado procès independentista con acordanza. E sabedes por que? Porque cando gaña a convivencia Feijóo e Abascal quedan sen discurso".
As especulacións sobre a demora no recoñecemento do Estado palestino quedaron despexadas na súa intervención.
"Pois claro que vai existir e España vaino recoñecer e vouno anunciar ante as Cortes xerais o vindeiro mércores".
Explicou Sánchez que a ultradereita internacional se reúne estes días en Madrid coa presenza de Milei porque España representa todo o que eles odian: feminismo, dignidade laboral, xustiza social e Estado do benestar.
