Rueda pide unha alta participación este 28M e agarda unha xornada "tranquila"

O presidente da Xunta de Galicia, Alfonso Rueda, considera "fundamental" que haxa unha gran participación nestas eleccións municipais do 28 de maio e confía en que a deste domingo sexa unha xornada "tranquila".

Rueda, tras exercer o seu dereito ao voto no Centro Galego de Tecnificación Deportiva de Pontevedra, apelou á "máxima" participación para elixir os alcaldes dos 313 concellos galegos. "O día convida a iso, hai unha boa climatoloxía e hai tempo para participar e gozar do resto do domingo", sostivo o presidente galego.

Como é habitual, Alfonso Rueda acudiu a votar acompañado das súas dúas fillas. Explicou que "sempre" lle acompañaron nestas citas electorais, aínda que nesta ocasión é un "día especial" xa que ambas votan por primeira vez. "Para alguén que se dedica á política é unha satisfacción que as túas fillas participen deste dereito da cidadanía", subliñou.