Rueda confirma que antes de final de ano se inaugura un novo treito da AG-59
Son os 3,5 quilómetros que unirán A Ramallosa e Pontevea e que confirman o avance da autovía que conectará A Estrada con Santiago
O presidente do PPdeG, Alfonso Rueda, participou no 11 Congreso local do PP da Estrada que elixiu a Gonzalo Louzao como presidente local
O presidente do Partido Popular de Galicia, Alfonso Rueda, asegurou que antes de que remate o ano estará inaugurado un novo treito da AG-59, que conecta Santiago coa Estrada. Son os 3,5 quilómetros que unirán A Ramallosa e Pontevea.
"Co que se vai inaugurar nun par de meses, en tres como moito, e o que empeza agora mesmo a facerse, A Estrada terá a autovía que a une con Santiago e que tanto merecía", asegurou Rueda.
O presidente do PPdeG fixo estas declaracións no undécimo congreso local do PP da Estrada que elixiu a Gonzalo Louzao, actual alcalde desta localidade, como presidente dos populares en substitución do conselleiro de Cultura, José López Campos. No congreso participaron máis de mil persoas.
.png)