Rueda agradece o esforzo dos efectivos galegos contra os incendios

O presidente da Xunta, Alfonso Rueda, recibiu o continxente galego que loitou contra os incendios noutras comunidades. Os equipos que traballaron sobre o terreo alertan da voracidade dos novos lumes.

O bombeiro forestal Jorge Ballesteros di en León volveron a ver "como o lume se puxo fóra da capacidade de extinción" e atopa "similitudes" entres os incendios dos últimos días e os que houbo o ano pasado en Galicia. 

A coordinación é clave tanto entre as administracións como entre os equipos de extinción. "Aportamos as nosas características e habilidades pero tamén aprendemos", explica o axente ambiental Carlos Sanmiguel que estivo desprazado en Castela e León.

Rueda di que Galicia está preparada para afrontar os meses de maior risco. "Temos que seguir moi atentos e con todos os medios despregados. Empezando polo dispositivo da Xunta que é o mellor de España e un dos mellores de Europa". 

O presidente galego tamén pide a colaboración cidadá para alertar de posibles incendios, e apunta que a nova aplicación ALume, que permite dar avisos, leva xa 7.000 descargas e máis de 200 alertas desde que está operativa. 

Na actualidade máis de 240 cámaras vixian os montes galegos. Ademais nesta campaña Galicia refórzase con novos medios aéreos.