Deteñen os autores dun roubo nun súper de Moaña tras unha persecución policial
Os tres detidos saíron pola caixa con dous carros cargados de comida e agasallos
Dous son de Tui e un de Vigo, de entre 25 e 30 anos, con antecedentes
Arranxaban as compras do Nadal. Roupa, bixutería e agasallos varios nun carro e comida e bebida no outro. Pasaron a liña de caixas sen pagar e marcharon para o coche, un Skoda azul mal aparcado a poucos metros.
"Tres persoas e fixeron unha compra grande de roupa e comida e baixaron cos carros, viñeron ata este aparcadoiro e marcharon escapados", conta un veciño.
O xerente do supermercado traoua de detelos, pero de pouco valeu. Se non aparta, lévano por diante. A el e a canto peón e coche atoparon polo camiño, porque saíron queimando roda.
Atravesaron Moaña en dirección Vigo, e non se cortaron en adiantamentos e manobras temerarias.
"Marchou a policía detrás, non sei ata onde", engade o mesmo mozo.
Non foron lonxe. Á uns cinco quilómetros, á altura da Borna, a Policía Local deulles alcance e, pola mansa, botáronse á dereita.
Os detidos son dous veciños de Tui, un home de 30 anos e unha muller de 25, e outro home da mesma idade, de Vigo. Están acusados de furto e xa tiñan antecedentes.
Dous quedaron en liberdade, á espera de xuízo pero o terceiro tivo que xustificarse ante o xuíz porque suma a maiores o delito de conducir de maneira temeraria. A policía recuperou a mercadoría roubada e tamén unha ferramenta para desactivar alarmas.
