Retiran o corpo do home atopado morto no interior da súa vivenda de Oleiros
Á falta dos resultados da autopsia, todo apunta a unha morte natural
A acumulación de lixo impediu o levantamento do cadáver nun primeiro momento
Contra as dez e media da mañá procedeuse ao levantamento do cadáver. Os servizos funerarios foron os encargados de trasladalo a un centro hospitalario.
"Por fin rematou o pesadelo. O cadáver que descanse en paz e agora a esperar a que limpen toda o lixo e que desinfecten", comenta unha veciña.
O finado é un home de 77 anos de idade, vivía só e podería padecer síndrome de Dióxenes. A veciñanza levaba sen velo arredor de medio mes. E só se relacionaba cunha veciña mediante notas que lle metía por debaixo da porta. A última, este luns.
"Non se relacionaba con ninguén, só cunha veciña a través de notas que lle mandaba por debaixo da porta".
"O cheiro era insoportable. Houbo xente que marchou durmir a outro sitio".
Contra as nove desta mañá, operarios de limpeza achegáronse á vivenda para proceder á retirada de lixo e obxectos co fin de permitir a entrada da médica forense, xa que onte lle foi imposible.
"Onte a forense non se negou a facer o seu traballo. A culpa foi do Concello, que dixo que non tiña persoal para mandar limpar ata hoxe".
Polo momento non se lle realizou a autopsia, porén a Garda Civil indica que a causa da morte foi probablemente natural.
