Rescatados un menor que quedou á valga nunha táboa de pádel surf en Boiro e unha moto acuática en Cangas
Rescatados un menor que quedou á valga nunha táboa de pádel surf en Boiro e unha moto acuática en Cangas
A embarcación Ría de Vigo conseguiu rescatar o menor; utra embarcación recolleu unha das persoas que se lanzaran ao mar para axudalo, mentres que a outra logrou regresar á costa polos seus propios medios
O piloto da moto tamén foi rescatado san e salvo
Rescate dunha moto acuática en Cangas (Salvamento Marítimo)
Os servizos de emerxencias rescataron na tarde deste martes un menor que quedara á valga nunha táboa de pádel surf na praia de Barraña, en Boiro.
O 112 Galicia tivo constancia deste suceso ao redor das 16:30 horas, despois de que un particular alertase de que un menor tiña dificultades para regresar á costa mentres practicaba pádel surf na praia de Barraña. A testemuña apuntou que a corrente o afastaba cada vez máis da beira.
Nese momento, dúas persoas introducíronse no mar coa intención de socorrelo, pero non conseguiron chegar ata el.
Desde o Centro Integrado de Atención ás Emerxencias solicitouse a intervención no operativo de Salvamento Marítimo, o Servizo de Gardacostas de Galicia, a Garda Civil, a Policía Local e os membros do Servizo Municipal de Protección Civil de Boiro. Ademais, mantívose contacto permanente cos socorristas da praia.
Ata o lugar desprazáronse o helicóptero de rescate Pesca I e a embarcación auxiliar Ría de Vigo, ambos de Gardacostas de Galicia.
Finalmente, foi a embarcación Ría de Vigo a que conseguiu rescatar o menor. Outra embarcación recolleu unha das persoas que se lanzaran ao mar para axudalo, mentres que a outra logrou regresar á costa polos seus propios medios. Todos se atopaban en bo estado.
Tamén na tarde deste martes, a Salvamar Mirach, mobilizada por CCS Fisterra, remolcou unha moto acuática que quedara á valga preto da praia de Areamilla (Cangas).
Tras embarcar o tripulante a bordo da Salvamar, remolcaron a moto ata o peirao de Marina Davila Sport.
