O turismo faise forte en Ferrol
As visitas ás oficinas de turismo da cidade medraron un 40 %
Máis da metade dos visitantes eran peregrinos do Camiño Inglés
Só no mes de maio, máis de mil visitantes pasaron por esta céntrica oficina de turismo de Ferrol.
"Subiron un 40 % con respecto a maio de 2025, e o balance do mes de xuño tamén apunta que vai ser moi bo, tanto de peregrinos como de visitantes, pero o que máis aumentou foi o número de peregrinos", explica Lourdes Fernández, informadora turística de Ferrol.
Peregrinos que teñen en Ferrol a porta de entrada do Camiño Inglés. Unha ruta de cinco etapas que gaña camiñantes cada ano que pasa.
O seu impacto económico na cidade foi medrando co tempo. Antes só pasaban unhas horas, pero semella que agora veñen con máis antelación.
"Notamos con respecto ao ano pasado que cada vez veñen antes, mesmo dous ou tres días antes da peregrinación, para visitar a zona antes de poñerse a andar. Iso é moi importante porque veñen de países moi alonxados e poñen a Ferrol no mapa", engade Lourdes.
Pero non todos veñen de lonxe. Tamén medrou o turismo nacional e o dos propios galegos que exploran a ruta modernista do arquitecto Ucha, o barrio da Madalena, as Meninas de Canido ou o patrimonio naval e militar da cidade.
Visitantes que atopan na gastronomía e nas praias de Ferrolterra o complemento ideal para pasar unhas vacacións que moitos repiten.
