Arrinca, sen incidencias, a PAU extraordinaria en Galicia con 2.916 alumnos matriculados en 15 sedes
Arrinca, sen incidencias, a PAU extraordinaria en Galicia con 2.916 alumnos matriculados en 15 sedes
"Todo está preparado para que as probas se desenvolvan con normalidade, equidade e coas máximas garantías", asegurou a CIUG nun comunicado
Fronte á polémica suscitada polos erros en varios exercicios da convocatoria ordinaria, esta primeira xornada transcorreu sen incidencias nas preguntas dos exames
Vigo é a sede onde se examinan máis estudantes, en total 711, séguenlle A Coruña con 555 matriculados e Santiago de Compostela con 528
TVG
A convocatoria extraordinaria da Proba de Acceso á Universidade (PAU) congrega desde este martes e ata o xoves a 2.916 estudantes en 15 sedes repartidas polas catro provincias galegas, segundo os datos difundidos pola Comisión Interuniversitaria de Galicia (CIUG).
A CIUG agradeceu e recoñeceu "o esforzo e o traballo realizado por todas as persoas implicadas neste proceso", desde o profesorado, ao persoal de administración e de servizos, ata as comisións delegadas e colaboradores.
A Comisión Interuniversitaria de Galicia salienta a actitude respectuosa dos estudantes
"Todo está preparado para que as probas se desenvolvan con normalidade, equidade e coas máximas garantías", insistiu a CIUG nun comunicado.
Con todo, a Comisión Interuniversitaria agradeceu especialmente "a actitude respectuosa que sempre mostra o alumnado favorecendo o correcto desenvolvemento das probas" e reiterou o seu compromiso cunha universidade pública "de calidade e accesible a toda a sociedade".
Vigo, con 711 matriculados, onde se examinarán máis estudantes
Por volume de alumnos, destacan as sedes de Vigo, que suman 711 estudantes repartidos entre a Facultade de Filoloxía e Tradución (245), o Edificio de Ciencias Experimentais (239) e a Escola de Enxeñería de Telecomunicación (227).
Séguenlle A Coruña con 555 matriculados e Santiago de Compostela con 528 alumnos entre os seus dous centros asignados.
No resto da comunidade, a afluencia distribúese do seguinte xeito: Pontevedra (352), Ourense (275), Lugo (231) e Ferrol (172). Así mesmo, habilitáronse centros en localidades como Viveiro (39), A Rúa (37) e Cee (16) para facilitar a realización dos exames.
Sen incidencias nesta primeira xornada
Fronte á polémica suscitada polos erros en varios exercicios da convocatoria ordinaria, esta primeira xornada transcorreu sen incidencias nas preguntas dos exames.
A maior parte dos matriculados preséntase por primeira vez tras superar algunha materia pendente do bacharelato, mentres que outros repiten materias para mellorar as cualificacións obtidas na convocatoria ordinaria. As notas provisionais publicaranse o 9 de xullo.
