Redúcese o desconto do Goberno nos carburantes de 15 a 10 céntimos este sábado

O desconto que ata o de agora se aplicaba aos carburantes a través do imposto especial de hidrocarburos para que os cidadáns fagan fronte ás consecuencias económicas do conflito en Oriente Medio, baixará desde este 1 de agosto de 15 céntimos a 10 céntimos por litro. 

A fin de paliar os efectos derivados do incremento dos produtos enerxéticos, o Goberno incluíu no último real decreto lei de medidas ante o efecto da guerra en Irán unha baixada de tipos no ámbito do imposto sobre hidrocarburos de 15 céntimos de euros por litro no mes de xullo, de 10 céntimos de euro por litro no mes de agosto e de 5 céntimos de euro por litro no mes de setembro.   

O Executivo incorporou na norma a excepción de que, se por circunstancias extraordinarias, no mes de xuño de 2026 o índice de prezos ao consumo (IPC) da gasolina ou do gasóleo superase en máis dun 15 % os prezos do mesmo mes do ano anterior, a baixada dos tipos de gravame tanto da gasolina como do gasóleo sería de 20 céntimos por litro durante o mes de agosto e de 15 céntimos por litro durante o mes de setembro. 

 Os datos do Instituto Nacional de Estatística (INE) confirmaron que en xuño os prezos dos combustibles baixaron, fronte á subida en xuño do ano anterior, polo que o alivio fiscal aos carburante pasará a recortarse a partir do 1 de agosto en plena operación saída.

No texto referendado polo Congreso dos Deputados tamén se recolle a excepción de que, se o IPC de xullo supera en máis dun 15 % o IPC do mesmo mes do ano anterior, a baixada dos tipos de gravame tanto da gasolina como do gasóleo será de 20 céntimos por litro durante o mes de setembro. O INE publicará os datos con esta información o próximo 13 de agosto.