Recollen na Coruña case 600 quilos de tapóns recompilados por nenos

A Asociación de Axuda a Superar as Enfermidades Raras, Aser, ten máis de 400 puntos de recollida de tapóns na provincia da Coruña pero o último sábado de agosto fai unha recollida directa no Club do Mar de Santo Amaro. Os protagonistas deste acto solidario son os pequenos da casa. 

O encontro ten formato de concurso. Pésanse as bolsas de tapóns que leva cada cativo e todos os recompiladores marchan con algún dos premios doados para a ocasión por empresas locais. 

"É moi importante para que os nenos se conciencien de que hai que axudar outros nenos", subliña o vicepresidente de Aser, Julio Ángel Rey.

O labor de Aser esperta conciencias en Galicia e moito máis aló. A asociación recibe todos os anos un lote de tapóns que xuntan dous nenos galegos que viven en Dubai.

"É un matrimonio que ten dous rapaces e facturan, sempre que veñen de vacacións, unha maleta, única e exclusivamente, con tapóns para traernolos a nós", conta Alfonso Cabado, outro membro de Aser.

Alfonso e Julio están xubilados e dedican, como voluntarios de Aser, cinco días á semana a recoller e seleccionar os tapóns doados en toda a provincia e levalos a Lugo onde llelos compran para reciclar. Cada ano xuntan entre quince e vinte toneladas.

"Economicamente, un ano collemos 6.000 euros; outro ano, 4.000, e o ano pasado collemos 3.500", explica Julio Ángel Rey.

Os beneficios van integramente a afectados por enfermidades raras.