Rebeca Torró será a nova secretaria de Organización do PSOE

Rebeca Torró, actual secretaria de Estado de Industria, é a persoa elixida para ocupar o posto de secretaria de Organización do PSOE en substitución de Santos Cerdán.

A valenciana Torró contará con tres persoas que serán adxuntas á Secretaría de Organización: Anabel Mateos, Francisco Salazar e Borja Cabezón. Mateos será a encargada da coordinación territorial; Salazar, de análise e acción electoral, e Cabezón, de transparencia e acción democrática.

Estes nomeamentos serán ratificados na reunión do Comité Federal do PSOE deste sábado.

Rebeca Torró, nacida en Ontinyent (Valencia) en 1981 e secretaria de Estado de Industria desde 2023, é licenciada en Dereito e avogada. Comezou a súa carreira política como tenenta de alcalde e concelleira de Urbanismo da súa localidade natal, e máis tarde foi vicepresidenta e deputada de Facenda na Deputación de Valencia.

En 2016 foi nomeada directora xeral de Vivenda, Rehabilitación e Rexeneración Urbana da Generalitat Valenciana, e en maio de 2019 secretaria autonómica de Economía Sostible, Sectores Produtivos, Comercio e Consumo da Generalitat.

O presidente do Goberno e secretario xeral do PSOE, Pedro Sánchez, optou finalmente por unha muller como número 3 do partido e decidiu que ese cargo teña tres persoas adxuntas para evitar a concentración de poder que existía ata o de agora.

Trátase dunha medida que poñerá en práctica despois da situación provocada polos dous últimos secretarios de Organización do PSOE, José Luis Ábalos e Santos Cerdán.

Montserrat Mínguez, nova voceira do PSOE

A deputada catalá Montserrat Mínguez será a nova portavoz do PSOE, en substitución de Esther Peña, e a concelleira en Madrid, a viguesa Enma López, farase cargo dunha portavocía adxunta de nova creación, segundo informou o partido.

Tanto o nome de Mínguez como o de López levaban semanas soando para asumir unha tarefa maior no partido, onde ata o de agora ocupaban a Secretaría de Traballo, Economía Social e Traballo Autónomo, e a de Política Económica e Transformación Dixital, respectivamente.

Montserrat Mínguez e Enma López (Europa Press)

Montserrat Mínguez (Lleida, 1976) é membro do PSC e é a man dereita do portavoz do partido no Congreso, Patxi López. Foi unha das catro persoas elixidas por Sánchez para a Secretaría de Organización colexiada e interina tras a saída de Cerdán.

Pola súa banda, Enma López (Vigo, Pontevedra, 1986) é inspectora de Seguros do Estado e actualmente concelleira no Concello de Madrid, onde pon voz ao Grupo Socialista en asuntos económicos desde que José Luis Martínez-Almeida chegou por primeira vez á Alcaldía, en 2019.

Licenciada en Dereito Económico Empresarial pola Universidade de Vigo e militante do PSOE desde 2002, foi asesora do Gabinete de Presidencia con José Luis Rodríguez Zapatero e con Pedro Sánchez. Tamén foi directora xeral da Fundación Estatal Saúde, Infancia e Benestar Social. 

Así, Sánchez sitúa tres mulleres en postos de responsabilidade e visibilidade.

Na reunión do Comité Federal socialista, ademais da reestruturación da dirección do partido, prevese que Sánchez anuncie algunhas medidas tras a crise provocada pola saída de Cerdán, aínda que algunha desas iniciativas podería desvelalas na súa comparecencia do próximo mércores ante o Pleno do Congreso.

Este venres, de forma previa á reunión do Comité Federal, Sánchez manterá unha reunión en Ferraz coas secretarias de Igualdade dos territorios e portavoces de Igualdade nas Cortes para analizar as medidas que presentará sobre esta materia o sábado. 

Fronte á executiva federal, algúns díscolos do PSOE declaran estar insatisfeitos coa resposta do seu líder. Nas redes sociais, o expresidente de Aragón, Javier Lambán, pediulle a Pedro Sánchez "que dea un paso atrás e convoque eleccións".

Tamén se sumou ás críticas Tomás Gómez, exsecretario xeral do PSOE en Madrid. Considera que "o que tiña que facer Pedro Sánchez é marchar para a súa casa, deixar de facer dano a España e o PSOE, e que se abra un novo período".

Un período, suxire Tomás Gómez, que podería estar liderado por outro dos críticos, Emiliano García-Page. Xusto este venres cumpre dez anos como presidente autonómico de Castela-A Mancha e aproveita a efeméride para sacar peito e mandar unha picada: "algúns non saben sequera se van cumprir o fin de semana no mesmo cargo (...), algúns ao mellor ata nin saben se van estar libres pola rúa ou terán que verse no cárcere".

No plano xudicial, continúan as pescudas. Este venres declararon no Tribunal Supremo tres dos cinco empresarios que están imputados na causa. Recoñecen que pasearon polos ministerios pero negan que pagaran comisións ilegais a cambio de obras públicas.