Tellado: "Temos que desmontar o negro legado que deixa Pedro Sánchez"

O secretario xeral do PP, Miguel Tellado, dixo que o principal obxectivo do seu partido pasa por "gañar a Pedro Sánchez para recuperar España" e poñer fin así ao "negro legado" que deixa "o sanchismo" tras estes anos dos socialistas a cargo do Goberno.

No acto de clausura da segunda interparlamentaria do PP ourensán, celebrada no claustro de San Francisco, reivindicou a necesidade de conseguir unha vitoria e iniciar así a "reconstrución" de "todo o destruído polo sanchismo", que ao seu xuízo debe liderar Alberto Núñez Feijóo.

"Temos que gañar a Sánchez para recuperar España e gañarlle ben, coa distancia suficiente para darlle ao noso país a estabilidade política que non tivo ao longo dos últimos oito anos", proclamou.

O dirixente popular defendeu a xestión do seu partido fronte á "situación de desastre político absoluto" que, na súa opinión, vive o país desde a chegada de Sánchez ao poder.

Por esta razón, chamou aos seus a traballar para que o sanchismo pase a ser "unha nota ao rodapé" e que o PP protagonice a "gran derrota final" do presidente do Goberno.