Queremos Galego presenta un protocolo para acadar a normalización da lingua
O obxectivo da plataforma cidadá é frear a "emerxencia lingüística" na que se atopa o idioma
O documento, elaborado nos últimos meses por 57 entidades, pretende reverter a situación
Ana Pontón acusa o PP de converter o galego "nunha lingua residual" tras 17 anos de goberno
A praza da Quintana acolleu a convocatoria. EFE/ Xoán Rey
A plataforma cidadá Queremos Galego celebrou este sábado unha asemblea aberta na que presentou as principais conclusións do denominado protocolo Lingua Vital que pretende reverter o que cualifican como "emerxencia lingüística".
Elaborado por 57 entidades de diferentes ámbitos sociais, co apoio doutras 396, o documento recolle accións normativas e executivas concretas dirixidas a acadar a plena normalización do idioma galego.
Na praza da Quintana, en Santiago, o colectivo chamou á sociedade a reaccionar e asumir a responsabilidade da que "desertaron" as institucións respecto á lingua.
Segundo o portavoz, Marcos Maceira, hai ano e medio unha enquisa do Instituto Galego de Estatística revelaba que o castelán se consolidaba como o idioma máis falado en Galicia pero dende entón a Xunta só "reverteu a súa oficialidade".
"Nada impedía que a Xunta cumprise a súa primeira obriga legal que é a de promover a lingua galega, e contra isto a sociedade non quedou parada xa que era necesario elaborar unha alternativa á situación actual".
O protocolo parte dos obxectivos fixados por unanimidade no Plan Xeral de Normalización da Lingua Galega (2004) e de acordos internacionais, como a Declaración Universal dos Dereitos Lingüísticos (1996) ou a Carta Europea das Linguas Rexionais ou Minorizadas (2001).
Pretende avaliar o cumprimento dos puntos pactados, identificar os obstáculos que impediron o seu cumprimento e, finalmente, propoñer accións concretas que comprometan a colectivos sociais e institucións na súa execución.
"O reto que temos agora é cumprir estas medidas. Nós non facemos como a Xunta, que aproba un plan como o de 2004 para non aplicalo. A nosa intención é que sexa a sociedade galega a protagonista da reposición da lingua galega e de reverter a súa situación actual, e niso traballaremos nos próximos meses".
"Lingua residual"
Á convocatoria acudiu a portavoz nacional do BNG, Ana Pontón, que en declaracións á prensa reclamoulle ao Executivo galego un cambio de rumbo "urxente" nas súas políticas.
"O noso idioma está nunha situación crítica tras 17 anos cun goberno do PP que quere convertelo en lingua residual".
En liña co acordo social que promove Queremos Galego, Pontón emprazou ao Goberno autonómico "a recuperar o consenso" a prol do idioma que "o PP nunca debeu romper".
A líder nacionalista considera "imprescindible" o cumprimento do Plan Xeral de Normalización Lingüística, así como "a derrogación do decreto da vergoña, que converte o galego nunha lingua de segunda".
