Putin anuncia a despregadura de armas nucleares e di que a ofensiva ucraína xa empezou
Putin anuncia a despregadura de armas nucleares e di que a ofensiva ucraína xa empezou
O sistema de mísiles Iskander-M xa foi entregado a Minsk, que o ve como "unha resposta efectiva á política agresiva dos países hostís"
O presidente ruso, Vladímir Putin, asegurou este venres que xa comezou a contraofensiva ucraína, o que se evidencia pola despregadura na fronte de reforzos do inimigo.
"Podemos constatar con certeza que a contraofensiva (ucraina) xa comezou", dixo Putin á prensa.
Vladimir Putin, anunciou tamén o despregamento do armamento nuclear táctico en territorio da veciña Bielorrusia a partir do 8 xullo. "Como vostede sabe, o 7-8 de xullo terminará a preparación das correspondentes instalacións e de inmediato comezaremos o despregamento no seu territorio do armamento correspondente. Así que todo vai segundo o planeado", dixo Putin ao reunirse co seu colega bielorruso, Alexandr Lukashenko, na súa residencia de verán no balneario de Sochi.
Putin mostrouse disposto a abordar cos seus homólogo asuntos vinculados coa seguridade no marco da guerra en Ucraína, país que limita con ambos os países.
A finais de maio Lukashenko anunciou en Moscova o comezo do traslado das armas nucleares tácticas rusas tras desvelar que Putin xa asinara o correspondente decreto de emprazamento.
Os ministros de Defensa de Rusia, Serguéi Shoigú, e de Bielorrusia, Víktor Jrenin, subscribiron hai dúas semanas en Minsk os documentos que regulamentan o almacenamento de armas nucleares "non estratéxicas" en territorio da antiga república soviética.
Moscova resaltou que o sistema de mísiles táctico-operativo Iskander-M, capaz de usar mísiles non só en armas convencionais, senón tamén nucleares, xa foi entregado a Bielorrusia, que o ve como "unha resposta efectiva á política agresiva dos países hostís"."Algúns dos avións bielorrusos foron convertidos para o posible uso de armas nucleares. Os militares recibiron o adestramento adecuado", comentou Shoigú.
O ministro ruso subliñou que, mentres Rusia desprega armas nucleares non estratéxicas no territorio de Bielorrusia, Moscova reterá o control sobre elas e sobre a decisión do seu eventual uso."Rusia non transfire armas nucleares á República de Bielorrusia: o control sobre eles e a decisión de utilizalos segue sendo da parte rusa", salientou.
