Puente anticipa dous anos máis de incidencias ferroviarias ao confluír trens a estrear cos obsoletos

O ministro de Transportes e Mobilidade Sostible, Óscar Puente, anticipou que nos dous próximos anos produciranse máis incidencias na rede ferroviaria, ao ter que estrear novos trens que poden dar problemas, ao mesmo tempo que conviven con outros trens vellos que quedaron obsoletos.

Nunha comparecencia no Congreso dos Deputados a iniciativa propia para informar da actual situación dos trens, Puente admitiu esta conxuntura durante os dous próximos anos, pero que ve necesaria para renovar a frota de material rodante e elevar a calidade do servizo a longo prazo.

O ministro lamentou que pasasen 15 anos sen estrear ningún novo tren de longa distancia e mesmo 17 anos no caso dos proximidades. E agora que se puxo en marcha o primeiro deses trens, o Avril de Talgo da serie 106 de Renfe, deu problemas.

"Recentemente tivemos unha incidencia moi seria nestes trens ao detectar nun unha revisión rutineira algunhas fisuras nos 'bogies' dos trens que serven na liña Madrid-Barcelona, o que nos obrigou a retiralos da circulación, coas afectacións lóxicas que iso supón", explicou.

Con esta experiencia, Puente advertiu de que os novos trens que se empezarán a estrear a partir do ano que vén poden tamén incorrer nese "pecado de mocidade", mentres que os trens máis vellos poden dar problemas pola súa antigüidade.

"Quero ser moi cauto porque eu prometíamas moi felices co tren Avril e logo non foi tanto. Temo que os dous seguintes anos imos atoparnos nas dúas partes da curva, cun material novo que algún problema dará e cun material nos seus últimos anos de vida", argumentou.

Puente adiantou que dos 500 trens novos que se encargaron o ano pasado, os primeiros de proximidade chegarán a principios do ano que vén, a un ritmo de entrega duns dous por semana.

Con todo, cre que é necesario incorporar máis trens á frota de Renfe, de forma que xa tivo os primeiros contactos cos fabricantes (esta semana estivo na fábrica alemá de Siemens) para lanzar outro grande encargo.

Atrasos de 6,2 minutos

Durante a súa comparecencia, Puente informou ademais de que o atraso medio dos trens da frota de media e longa distancia de Renfe foi de 6,2 minutos desde o 1 de xaneiro ata o 2 de setembro.

Precisou sobre a puntualidade dos trens de Renfe que, das 71.062 circulacións dos citados tipos de trens, 48.444 chegaron á súa hora ata setembro (68,2 % do total).

Outros 11.645 trens, proseguiu, chegaron cun atraso inferior a 15 minutos (o 84,6 %) ata setembro; 5.992 trens marcaron un atraso menor a 30 minutos (o 93 %); e no 2,4 % aproximadamente de desprazamentos o seu atraso foi superior á hora.

"Caos, desprestixio e propaganda"

Tras a súa intervención, o titular de Transportes escoitou as críticas da oposición. O deputado do PP Héctor Palencia asegurou que Puente "non é un ministro", senón "un tuitero con coche oficial". Na súa opinión, a xestión do socialista pode resumirse en tres palabras: "caos, desprestixio e propaganda".

Pola súa banda, o deputado do BNG Néstor Rego preguntoulle se Galicia ía sair "prexudicada e discriminada" nos investimentos que realiza o goberno do Estado. Na súa resposta, Óscar Puente afirmou que "se hai unha terra que pode presumir de mellora ferroviaria en España nos últimos anos, sen ningunha dúbida, esa é Galicia".