A Fiscalía pídelle á UCO analizar o 'pendrive' de Leire Díez para ver se hai indicios de delito

A Fiscalía da Audiencia Nacional encomendoulle á Unidade Central Operativa (UCO) da Garda Civil que analice o contido do lapis de memoria que a exmilitante socialista Leire Díez entregou ao PSOE e que o partido derivou á Fiscalía Xeral do Estado, co fin de comprobar se hai ou non indicios de delito. Acordouno logo de abrir dilixencias de carácter reservado.

Dáse a circunstancia de que a Fiscalía ordenou a análise do contido do dispositivo á unidade investigadora da Garda Civil sobre a que, presuntamente, Díez buscaba información comprometedora.

Ese 'pendrive' recolle a información que Díez foi recompilando nos últimos anos.

Aínda que nun principio se valorou a posibilidade de enviar o lapis de memoria á Fiscalía Anticorrupción, finalmente recaeu na Fiscalía da Audiencia Nacional.

"Nós o que queremos é que se coñeza a verdade, que haxa luz e taquígrafos e que sigamos avanzando neste país", asegura a entón portavoz do PSOE, Esther Peña.

Leire Díez situouse no epicentro da polémica desde que El Confidencial publicou uns audios en que se escoitaba falar con empresarios inmersos en causas xudiciais coa intención de buscar información comprometida contra o tenente coronel da UCO Antonio Balas e o fiscal de Anticorrupción José Grinda a cambio de beneficios xudiciais.