Proxectan outras 168 vivendas de promoción pública en Lugo
Levantaranse no barrio de Garabolos, onde xa se constrúen máis vivendas e onde hai proxectadas unhas 600
Facilítase o acceso ás familias, amplíase o límite de ingresos e de idade, ata os 45
2.121 persoas agardan por unha vivenda pública na cidade de Lugo, son 200 máis ca en maio. Algúns deles acabarán vivindo neste barrio, o de Garabolos, onde hai proxectada a construción de máis de 600 vivendas.
"Sobre todo para a xente nova que hoxe o ten moi complicado", di unha muller.
Haberá vivendas en réxime de alugueiro e para mercar, como estas 168 que se presentaban hoxe.
"Hoxe vemos un plano, un pouco máis abaixo unhas obras, a curto prazo veremos fogares, familias e veremos medrar a cidade", explica a alcaldesa de Lugo, Elena Candia.
Máis familias poderán acceder a elas. Amplíanse os límites de ingresos e a idade, ata os 45 anos.
"Máis familias poden acceder a estas vivendas, e poño un exemplo se antes unha nai con dous fillos non podia exceder os 2.250 euros brutos ao mes agora pode alcanzar os 3.500", explica a conselleira de Vivenda, María Martínez Allegue.
Os que xa viven neste barrio destacan a súas vantaxes.
"É un barrio tranquilo, con moitos servizos, próximo a varias áreas comerciais", di un veciño.
Son todas vivendas con eficiencia enerxética, luz e ventilación natural.
