A Xunta Electoral expedienta a Candia por unha visita a un aparcadoiro municipal en Lugo

A Xunta Electoral de Zona de Lugo acordou a apertura dun expediente sancionador á alcaldesa de Lugo, Elena Candia, por mor dunha denuncia presentada polo PSOE en relación cunha visita que realizou a rexedora ao aparcamento disuasorio situado no polígono do Ceao e a “posterior difusión dunha nota de prensa municipal na que presumía da súa xestión” e “atacaba ao anterior goberno” da cidade.

Así o explica o propio Partido Socialista nun comunicado difundido este venres, no cal afirma que “a resolución declara que a dirixente popular vulnerou a Lei Electoral ao utilizar fondos públicos, pagados por todos os lucenses, para promover a súa xestión en plena campaña electoral e atacar o anterior Goberno municipal”.

Ademais, cualifica os ataques ao anterior goberno municipal como “claramente contrarios á debida neutralidade” e conclúe que ambas as actuacións vulneraron a “Lei Electoral, que prohibe utilizar actos institucionais para vender accións de goberno durante o período electoral”.

Por iso, alén de abrir o expediente sancionador, precisa o PSdeG, ordénalle "ao Concello retirar inmediatamente a nota de prensa do seu web e require a Candia que se absteña de realizar actuacións similares ata as eleccións".