Prospera a moción de censura en Rairiz de Veiga e Camilo Fernández, exedil do PP, é o novo alcalde
A sesión celebrouse entre protestas veciñais en apoio á exrexedora socialista, Asunción Morgade
Votación no pleno da moción de censura en Rairiz de Veiga. TVG
O concello ourensán de Rairiz de Veiga ten novo alcalde, logo de saír adiante a moción de censura presentada por toda a oposición.
Camilo Fernández, exconcelleiro do Partido Popular, asumiu o bastón de mando co apoio doutro exedil popular, de dous exconcelleiros do BNG e doutro edil non adscrito que abandonara o Partido Socialista.
O novo rexedor asegura que era necesario un cambio de rumbo no Concello.
A xa exalcaldesa do Partido Socialista, Asunción Morgade, atribuiu a moción de censura a intereses persoais e anunciou que presentará recurso porque dous edís socialistas non foron notificados da convocatoria do pleno.
A sesión celebrouse entre protestas veciñais en apoio á exrexedora.
