Promoven a creación de paquetes turísticos no Courel e Valdeorras
Turismo de Galicia dota 90.000 euros para que a Asociación Galega de Axencias de Viaxes deseñe as propostas cos axentes locais
Prevén que se poidan ofertar na temporada de outono
Insisten en que a pesar do incendio os visitantes teñen moito do que gozar
Sobre o terreo, nunha casa rural do Courel, Turismo de Galicia promoveu un primeiro encontro entre axentes do sector e entidades locais para facer propostas concretas para reactivar a actividade nas zonas máis afectadas polos incendios de xullo.
"Ao Courel pódese seguir vindo, comer, descansar, facer rutas. Esa é a forma máis bonita e máis produtiva de podernos axudar", recalcaba a alcaldesa de Folgoso, Lola Castro, que tamén participou na xornada de traballo.
Partindo desa premisa, a sesión tivo como base un convenio asinado entre Turismo de Galicia e a Asociación Galega de Axencias de Viaxes para elaborar paquetes turísticos que axuden a recuperar visitantes.
O convenio está dotado con 90.000 euros e prevé que as axencias de viaxes oferten xa os novos paquetes turísticos na temporada de outono.
