Ingresan no cárcere dous dos catro detidos pola liorta no centro de Pontevedra

A maxistrada do Xulgado de Instrución Número 3 de Pontevedra decretou o ingreso en prisión provisional, comunicada e sen fianza, para dous dos catro detidos pola pelexa deste martes na praza de Barcelos, no centro de Pontevedra.

Segundo informa o Tribunal Superior de Xustiza de Galicia (TSXG), as outras dúas persoas arrestadas quedaron en liberdade provisional coa obriga de comparecer apud acta (as veces sinaladas e cando a xuíza o decida), co pasaporte retirado e coa prohibición de saír do territorio nacional e de aproximarse e de establecer comunicación coas vítimas.

Os detidos están investigados por delitos de lesións agravadas e homicidio en grao de tentativa. Na liorta, que se produciu sobre as 19:00 horas do martes, tres persoas quedaron feridas por arma branca e a Policía Nacional busca a un quinto implicado, que xa está identificado.