Publicador de contidos

Publicador de contidos

Prisión provisional e sen fianza para o vigués que matou á muller en Tenerife

Prisión provisional e sen fianza para o vigués que matou á muller en Tenerife

O xuíz de Arona impútalle un delito continuado de malos tratos e outro de asasinato

O caso pasará agora ao xulgado de violencia sobre a muller

A filla da vítima e do seu asasino abandona os xulgados de Arona, tras coñecer a decisión do xuíz
G24.gal 14/05/2022 20:13 Última actualización 14/05/2022 20:26

O maxistrado decretou prisión provisional, comunicada e sen fianza para Ángel Martínez, de 83 anos, acusado de matar a súa muller, Clotilde Rodríguez, de 82, na vivenda de Tenerife, onde esta parella viguesa pasaba longas temporadas.

O titular do xulgado, que estaba de garda, impútalle un delito continuado de malos tratos e outro de asasinato coas agravantes de aleivosía, porque a vítima non tivo opción de defenderse, de parentesco e de xénero. O caso pasará a partir de agora ao xulgado de violencia sobre a muller.

O crime tivo lugar o mércores. Foron os veciños os que chamaron os servizos de emerxencia porque escoitaban berros na vivenda. Cando chegaron atoparon a muller acoitelada no medio dun charco de sangue e á beira o seu home, con feridas de arma branca que se fixo el mesmo.

Catorce mulleres asasinadas

Tras ser atendido no hospital, o xoves foi trasladado aos calabozos da comisaría, onde permaneceu ata que pasou a disposición xudicial. Agora agardará en prisión á celebración do xuízo e Clotilde ingresa na lista de mulleres vítimas das súas parellas ou exparellas, 14 asasinadas só no que vai de ano.

Mentres, continúan as concentracións para condenar a violencia machista e a vicaria. Este sábado celebrouse unha en Gran Canaria convocada por un colectivo feminista.

Publicidade
Publicidade
Publicidade