Prisión para os tres detidos supostamente implicados na morte dun home na Coruña

O xuíz envía a prisión as tres persoas detidas pola Policía Nacional supostamente relacionadas coa morte dun home de 42 anos, coñecido como o Malaguita, na rúa Biscaia da Coruña este sábado pasado pola mañá.

Os detidos, dous homes e unha muller, chegaban arredor das nove e media da mañá, pasaban a disposición xudicial no Xulgado da Coruña e declararon durante toda a mañá ante o xuíz.

A vítima atopouna morta na mañá do sábado, no seu domicilio, unha compañeira de piso, que foi a que alertou os servizos de emerxencia. Segundo fontes próximas á investigación, no momento dos feitos, sete eran as persoas que nese intre estarían na vivenda, entre elas a moza do falecido. Na xornada do luns, axentes da Policía detiveron un home, coñecido da vítima e pola veciñanza, pois conta con antecedentes por varios furtos e roubos con forza.

Os outros dous presuntos agresores e implicados no asasinato permanecían arrestados desde o martes.

Parece que todo apunta a que os tres implicados nos feitos, nun principio por un axuste por unha débeda, torturaron, golpearon e intentaron asfixiar a vítima. Segundo o informe forense, o home presentaba varias contusións e feridas. 

As investigacións apuntan a un axuste de contas por un tema de drogas, xa que os catro, vítima e detidos, son todos drogodependentes.