Primeiro domingo co comercio aberto para as compras do Nadal

Este domingo foi o primeiro dos sete festivos que abrirán os comercios de aquí ata o día de Reis. Cada vez adiantamos máis as compras do Nadal, por iso cidades coma Vigo tiñan hoxe unha actividade na rúa e nos centros comerciais similar á de calquera día da semana. 

Aínda non remataron os descontos do black friday pero o maratón de consumo que trae o Nadal non para. A media mañá do domingo a xente que camiñaba polas rúas do centro de Vigo xa levaba varias compras feitas e o mesmo ocorría nos centros comerciais. 

"Eu síntoo pola xente que ten que traballar pero si que é certo que cando traballas toda a semana e tes nenos, sacas o tempo de onde podes. E que abran os domingos sempre che axuda un pouco"

"Para nós é cómodo o que pasa é que a xente que ten que traballar imaxino que non está tan contenta. É un mes, nada máis"         

"Facemos quendas e unha vez que abres gústache que haxa xente porque ao final é un mes e medio de moito traballo. Faise duro pero realmente está ben", asegura unha traballadora                     

E ademais das tendas de roupa e de decoración hoxe tamén foi xornada de actividade nas xogueterías porque moitos cativos aproveitan o día sen escola para ir preparando as súas listas de desexos, supervisados por algún familiar.

Adiantar as compras é para moitos un xeito de xestionar a economía familiar e facer un consumo máis responsable.