O belén de Valga volve mesturar actualidade con escenas do Nadal
Está aberto ata o 11 de xaneiro e a visita é de balde
Catro mil figuras, en distintos escenarios, compoñen o belén artesanal en movemento de Valga. Trinta e cinco persoas traballaron desde outubro para montar este belén no que conviven as escenas clásicas do Nadal con elementos da cultura galega e cuestións de actualidade.
"Os políticos sempre están axudando a que poñamos cousas novas; o do Vaticano, a morte do papa Francisco e a proclamación do novo Papa, a voda de Cayetano de Irujo, a pedida de matrimonio de Cristiano Ronaldo, os incendios en Galicia", explica Romina Castiñeiras Martínez, unha das persoas que participou na elaboración.
A zona onde se recrea o municipio de Valga lembra o día do apagamento e acontecementos protagonizados por veciños.
"Quedamos de campións do mundo de remo este ano e estamos aí representados. Moi ben, debía haber cinco ou seis anos que non viña e quedei sorprendido. Está moi ben e as figuras moi logradas, xenial", di un dos visitantes que aparece como figura do belén.
Calcúlase que o ano pasado visitaron esta montaxe 45.000 persoas.
"Non pensas que vai ter esta repercusión e mais aínda porque conservamos o tema relixioso, pero metemos retranca galega e resulta un pouco contraditorio o belén que encontran e o que esperan encontrar", conta Romina Castiñeiras Martínez, que participou na elaboración do belén pintando as figuras.
"Chulo. É o primeiro ano que vén e encantoulle".
"As casas de pedra, está todo moi ben montado, moi curioso", di unha familia.
O belén abre a diario de cinco e media a oito e media da tarde e os domingos e festivos tamén pola mañá. A visita é de balde.
