Poxada por 6,5 millóns de euros unha cámara de fotos Leica do papa Francisco

Unha cámara de fotos que a marca Leica deseñou e regalou ao papa Francisco en 2024 foi poxada en Viena este sábado por 6,5 millóns de euros.

Eses cartos vanse dedicar a obras de caridade por expreso desexo do pontífice, falecido no mes de abril.

A cámara é unha creación exclusiva con corpo revestido en branco, en alusión á vestimenta papal e ten varios gravados, entre eles o lema de Francisco: "Mirouno con misericordia e elixiuno" ('Miserando atque Eligendo') e o escudo de armas do Vaticano.

Esta cámara única compleméntase cunha caixa de presentación deseñada exclusivamente para este equipo.

O prezo de saída fixado en 30 mil euros foi superado rapidamente. A poxa durou case dez minutos e resolveuse nunha competida batalla entre dous compradores telefónicos non identificados ata alcanzar os 6,5 millóns de euros.