Pontón tacha de "refrito" a proposta de financiamento do Goberno

A portavoz nacional do BNG, Ana Pontón, mostrou este domingo o seu rexeitamento á proposta de financiamento autonómico presentado o venres polo Goberno central, ao tachala de "refrito", e avogou por "dar a Galicia a chave do seu diñeiro".

Durante unha homenaxe ao intelectual e político Alfonso Daniel Rodríguez Castelao en Rianxo, afeou que o presidente da Xunta, Alfonso Rueda, se limitase a "repetir o argumentario cutre do PP de Madrid" e instou a concretar medidas contra a "discriminación histórica que sofre o país".

"Lonxe de reducir, aumenta a discriminación de Galicia", dixo a dirixente nacionalista sobre o plan do Executivo, ante o que esixiu un "concerto económico" para recadar a totalidade dos recursos da comunidade autónoma, ademais de dotarse dunha "facenda propia con capacidade fiscal plena".

Pontón sostivo que non é Galicia "a que vive do Estado, senón o Estado quen fai caixa con Galicia", e aludiu tanto ao galeguista Castelao como ao político Alexandre Bóveda para reclamar "unha Galicia soberana tamén no financeiro; porque sen capacidade de decisión financeira non hai capacidade de decisión política".