Piden incrementar a seguridade na estrada de Mos onde atropelaron unha peregrina
A Garda Civil trata de dar co condutor que atropelou á camiñante e que fuxiu do lugar do suceso
Os veciños de Mos están fartos de alertar da perigosidade da estrada nacional 550 ao seu paso por algúns puntos deste concello. No camiño da Quiringosta a diario presencian escenas nas que os peregrinos piden aos condutores que reduzan a velocidade ou desafían a sorte para poder cruzar a estrada pola que travesa o Camiño de Santiago.
Nas últimas horas tiveron que auxiliar unha peregrina. Atropelárona e o condutor fuxiu.
Os veciños levan moito tempo denunciando a perigosidade dunha vía que rexistra moito tránsito. Cruzar ou saír da casa convértese para eles nunha auténtica odisea.
Non é o único punto conflitivo. A poucos metros está a zona comercial de Ameiro Longo onde conviven perigosamente peóns, peregrinos e vehículos. Reclaman converter estes tramos en travesías urbanas coa sinalización adecuada para que poidan convivir con seguridade.
A peregrina atropelada tivo que ser trasladada a un centro hospitalario. A Garda Civil mantén aberta unha investigación e busca o condutor que escapou.
