Pharmamar recibe a aprobación da Comisión Europea do seu tratamento Zepzelca para cancro de pulmón
O director xeral de PharmaMar, Luis Mora, destacou que "pode cambiar o paradigma do tratamento desta enfermidade polo que confiamos que pronto estea á disposición nos hospitais de Europa"
Pharmamar
PharmaMar recibiu a aprobación da Comisión Europea (CE) do seu tratamento Zepzelca para cancro de pulmón, segundo indicou nun comunicado á Comisión Nacional do Mercado de Valores (CNMV) este luns.
A farmacéutica recibiu a noticia de que a combinación de Zepzelca (lurbinectedina) con atezolizumab (Tecentriq) obtivo a luz verde como tratamento de mantemento en primeira liña para pacientes adultos con cancro de pulmón de célula pequena (CPCP) en estadio estendido cuxa enfermidade non progresase tras a terapia de indución estándar.
Tras anunciar esta aprobación por parte de Bruxelas, os títulos da compañía chegaron a rozar unha alza do 3 % nos primeiros compases da sesión deste luns, aínda que, ao redor das 10.50 horas, moderaban este avance ata subir ao redor dun 1 %, ata os 101 euros.
Esta noticia chega despois de que o pasado 27 de marzo o Comité de Medicamentos de Uso Humano (CHMP) da Axencia Europea do Medicamento (EMA) dese a súa opinión positiva a este tratamento.
O director xeneral de PharmaMar, Luis Mora, destacou que "é unha gran noticia que agora os pacientes e os médicos europeos poidan ter acceso a unha nova terapia para este tipo de cancro". "Cremos que pode cambiar o paradigma do tratamento desta enfermidade polo que confiamos que pronto estea á disposición nos hospitais de Europa", engadiu.
A aprobación baséase nos datos do ensaio de fase '3 IMforte', patrocinado por Roche en colaboración con Jazz Pharmaceuticals, no que a combinación de lurbinectedina con atezolizumab en primeira liña de mantemento para CPCP en estadio estendido asociouse cunha redución do risco de progresión ou morte da enfermidade do 46 % e do 27 % no risco de morte en comparanza con atezolizumab en monoterapia.
Ademais, a EMA designou a lurbinectedina como 'medicamento orfo', unha categoría que se concede aos medicamentos destinados ao tratamento de enfermidades raras ou pouco frecuentes que afectan a menos de cinco persoas por cada 10.000 habitantes na Unión Europea.
