Pasteleiros e panadeiros celebran santo Honorato, patrón dos artesáns dos fornos

Homenaxe aos artesáns dos fornos en Redondela no día do seu patrón, santo Honorato. A Asociación dos Panadeiros e Pasteleiros de Pontevedra aposta pola supervivencia do oficio, e organizou unha exhibición dos alumnos do centro integrado de formación profesional Manuel Antonio de Vigo. Sonia Cabanas, xefa do Departamento de Industrias Alimentarias, coordinou a actividade en que os alumnos amosaron a súa arte no mundo do pan e a súa maridaxe.

Unha das actividades correu a cargo de Iban Yarza, xornalista especializado en pan e recoñece o valor dos nosos artesáns dos fornos. O pan galego ten sona dentro e fóra do país, pero a remuda xeracional é o gran problema. Recoñéceo Francisco Sánchez Bergantiños, presidente de APROINPPA. 

Ese problema non o teñen de momento na Panadería Nosa Señora da Peneda. Van pola cuarta xeración, e o neto do fundador recibe hoxe unha homenaxe póstuma dos compañeiros. O seu fillo, Rubén Troiteiro, canda seu irmán e parellas, seguen a tradición, e recoñecen a dura competencia dos elaborados industriais.

As celebracións por santo Honorato recoñecen especialmente o traballo de todas as mulleres que fixeron e fan do pan galego unha xoia artesanal.