Pablo Isla, expresidente de Inditex, presidirá Nestlé a partir de 2026
O consello propón a súa designación en substitución de Paul Bulcke, que deixa o posto
Pablo Isla, antigo conselleiro delegado de Inditex/CINVEN/ Foto de arquivo
Pablo Isla, o que foi conselleiro delegado de Inditex entre 2005 e 2011 e o seu presidente executivo entre 2011 e 2022, será o novo presidente do consello de administración de Nestlé a partir do 16 abril de 2026 en substitución de Paul Bulcke, o cal anunciou que non optará á reelección na xunta de accionistas do próximo ano.
Segundo revelou a multinacional suíza mediante unha nota de prensa, a substitución foi comunicada para facilitar unha "transición suave e ordenada".
Isla, que entrou no órgano reitor de Nestlé en 2018, foi vicepresidente e conselleiro independente principal do grupo desde 2024. Así mesmo, o directivo español é membro dos comités de nomeamentos, retribucións, presidencia e goberno corporativo da compañía.
"Agradezo ao consello a confianza depositada en min ao propoñerme como presidente e espero traballar con Laurent Freixe para o éxito continuo de Nestlé. Estou entusiasmado por asumir este novo cargo, xa que me identifico plenamente coa estratexia en nutrición, saúde e benestar de Nestlé e o seu enfoque na creación de valor compartido", afirmou Isla.
