Óscar Mingueza: “Confiamos a morte en Benítez”
Mingueza dixo estar seguro de que no vestiario azulgrá daranlle “máis importancia” ao duelo europeo contra o Nápoles que ao deste sábado en Balaídos
Óscar Mingueza, futbolista do Celta, asegurou este xoves que o equipo está “a morte” co técnico Rafa Benítez, a pesar da irregular traxectoria do equipo, con só tres puntos de vantaxe sobre a zona de descenso tras gañar unicamente catro partidos nas primeiras 24 xornadas de LaLiga.
“Todos os xogadores confiamos a matar no staff, neste barco estamos todos xuntos e creo que a afección tamén tería que seguir apoiándonos porque é moi importante que todos esteamos unidos. Esa é a única maneira de tirar isto para adiante”, afirmou en conferencia de prensa.
O lateral, reconvertido a centrocampista polo seu actual adestrador, asume que ao Celta tocaralle sufrir de novo para evitar o descenso de categoría a tempada do Centenario.
“Ata que non estea sentenciada a liga non haberá tranquilidade”, advertiu Mingueza, para quen a única maneira de saír desa complicada situación pasa por “dar a cara” en todos os partidos.
“A clasificación non está como desexariamos, pero imos tentar facer todo o posible para que vivir un final de tempada como o pasado, no que nos salvamos na última xornada”, lembrou.
Neste sentido, dixo que o equipo afronta con “moita ilusión” o partido deste sábado contra o FC Barcelona, un duelo que será especial para el polo seu pasado.
“Si que é verdade que eles non están a conseguir os mellores resultados, pero xogar contra o Barcelona nunca é fácil porque xogas contra bos xogadores e un equipo que está moi ben traballado. Eles teñen a súa idea de xogo moi metida na cabeza”, indicou.
Mingueza dixo estar seguro de que no vestiario azulgrá daranlle “máis importancia” ao duelo europeo contra o Nápoles da próxima semana que ao deste sábado en Balaídos, pero tamén advertiu que iso non impedirá que veñan “metidos ao cen por cento” polo triunfo.
