Os tests de antíxenos continúan esgotados nas farmacias
A demanda multiplicouse por mil na última semana
Colas por momentos nas boticas logo da cea de Noiteboa para facer un test de antíxenos. Pero en case todas están esgotados e o persoal farmacéutico non sabe cando vai dispoñer deles.
A alta demanda dos últimos días, que se multiplicou por mil, acabou coas existencias e mesmo fixo subir os prezos. Este venres pagáronse as derradeiras a case sete euros a unidade.
As familias fixeron provisión antes do 24 de decembro. Ese aumento da demanda e os problemas de loxística, fabricación e transporte levan á situación de escaseza.
O que aínda hai nas farmacias é o test de cuspe pero, polo de agora, o seu uso está restrinxido a menores de entre cinco e once anos de idade.
Incluso Papá Noel, a personaxe do día, lembra a importancia de seguir coas probas diagnósticas, coa vacinación e con levar o pasaporte da covid onde é obrigatorio.
No mellor dos casos, e en función de como evolucione a pandemia, non será ata mediados de xaneiro cando se recupere a subministración normal de test de antíxenos.
