Os socios do goberno de Navarra e EH Bildu pactan cunha comisión de investigación tras o informe da UCO

Os grupos parlamentarios de PSN, Geroa Bai e Contigo-Zurekin, que conforman o Goberno de Navarra, e EH Bildu acordaron a creación dunha comisión de investigación no Parlamento de Navarra sobre as adxudicacións levadas a cabo polo Goberno foral a empresas sinaladas no informe da UCO da Garda Civil.

A solicitude foi asinada por PSN, EH Bildu, Geroa Bai e Contigo-Zurekin e permitirá que os traballos arrinquen este mesmo verán.

A comisión estudaría as licitacións e adxudicacións de obras públicas levadas a cabo polo Gobeerno de Navarra ou financiadas por este entre xuño de 2011 e a actualidade. A proposta céntrase nos contratos nos que puidesen participar persoas físicas ou xurídicas sinaladas na investigación.

A exposición de motivos da iniciativa rexistrada polas catro forzas recolle que "non podemos permitir que a confianza nas institucións públicas, que é a pedra angular sobre a que se sustenta o noso sistema democrático, se vexa erosionada".

O texto continúa afirmando que "a información que coñecemos nos últimos días, que involucra representantes políticos e empresariais nunha trama de corrupción en distintos procesos de adxudicación de obras públicas, constitúe un elemento de enorme preocupación que erosiona a confianza nas institucións antes mencionadas, e que, por tanto, nos obriga a reaccionar".

Así, os catro grupos apoian esta comisión "baixo ese convencemento, e no esforzo de impulsar unha aposta total pola transparencia, a rendición de contas e o control democrático capaz de devolver unha confianza plena da cidadanía ás súas institucións".

EH Bildu "manifestou ao resto de grupos asinantes tanto a súa vontade para que o Parlamento de Navarra compareza na causa, como a súa disposición para presidir dita comisión parlamentaria". "Enfrontámonos a un grao elevado de incerteza e unha realidade moi cambiante, e desde EH Bildu imos abordala desde a sensatez, o rigor e a honestidade política, como sempre fixemos. Seguiremos sendo moi esixentes, porque ante a corrupción a resposta debe ser tolerancia cero", apuntaron.

Geroa Bai subliñou nunha nota de prensa que "o informe elaborado pola UCO, que si apunta a posibles actuacións ilegais no seo do PSOE, non sinala ningunha ilegalidade nas adxudicacións do Goberno de Navarra, pero o rigor, a transparencia e a responsabilidade institucional fronte á corrupción son a base do noso compromiso político". "Esta comisión de investigación é un paso máis na dirección correcta, non só para esclarecer calquera dúbida, senón para reforzar a confianza da cidadanía nas súas institucións", defendeu a coalición.

Pola súa banda, Contigo-Zurekin destacou que o acordo para crear esta comisión é "un paso clave en favor da transparencia institucional". "Este acordo demostra que a maioría progresista está comprometida coa rendición de contas e con dar todas as explicacións necesarias á cidadanía", sinalaron desde Contigo-Zurekin. 

Finalmente, as catro forzas acordaron non esperar a setembro e comezar "canto antes" coa posta en marcha da comisión.

Desde a Executiva de Contigo-Zurekin subliñaron que a proposta rexistrada é "máis ambiciosa e garantista" que as presentadas por UPN e PPN, que expuxeran unha comisión de investigación sobre a adxudicación das obras de Belate.