Rusia advirte de que se non se soluciona a cuestión territorial, non haberá paz en Ucraína

O Kremlin advertiu hoxe de que se non se soluciona a cuestión territorial, non haberá unha paz "duradeira" en Ucraína, tras as negociacións mantidas na madrugada do venres entre o presidente ruso, Vladimir Putin, e os emisarios da Casa Branca, Steve Witkoff e Jared Kushner.

"O importante é que durante estas negociacións entre o noso presidente e os americanos constatouse de novo que sen a solución da cuestión territorial (...) non se pode esperar o logro dun arranxo duradeiro", dixo Yuri Ushakov, asesor internacional do Kremlin, segundo a axencia TASS.

Ushakov precisou que dita solución debe seguir "a fórmula acordada en Anchorage", en alusión ao cume de agosto de 2025 entre Putin e o presidente dos EUA, Donald Trump, en que este renunciou a esixir a Moscova un inmediato cesamento do fogo como primeiro paso para o arranxo do conflito.

"Nós, como subliñou Vladimir Putin, estamos sinceramente interesados no arranxo da crise ucraína por métodos político-diplomáticos. Pero, mentres isto non ocorra, Rusia proseguirá de maneira consecuente logrando os obxectivos da operación militar especial no campo de batalla", destacou.

Como é habitual, o diplomático insistiu en que "as Forzas Armadas rusas teñen a iniciativa estratéxica", aínda que as baixas temperaturas e a neve frearon desde finais do pasado ano a súa ofensiva no corazón do Donbás.

Rusia insiste en que Ucraína retire ás súas tropas das catro rexións anexionadas en 2022 por Moscova, especialmente, do Donbás, que o exército ruso non logrou tomar en case catro anos de cruentos combates.