Os responsables dun prostíbulo de Vigo aboarán só 1.566 euros á Seguridade Social

A sección quinta da Audiencia Provincial de Pontevedra confirmou que os dous responsables dun chalé-prostíbulo de Vigo, condenados a un ano e medio de prisión, só deberán abonar 1.566 euros á Seguridade Social, que reclamaba preto de 20.000.

Segundo a sentenza, que deu a coñecer este mércores o Tribunal Superior de Xustiza de Galicia, ao non precisarse no escrito de acusación o período que a Tesourería Xeral da Seguridade Social pretendía que se lle indemnizara a responsabilidade civil debe corresponder exclusivamente aos días concretos nos que se desenvolveu a intervención policial e inspectora.

Por este motivo, a Sala considera procedente fixar a responsabilidade civil no importe das 19 cotas resultantes de dar de alta ás persoas prostituídas unicamente nos días 15 de febreiro e 25 de agosto de 2023, os das inspeccións, coa cota diaria de 82,46 euros por cada unha.

A Seguridade Social, non conforme 

A avogada da Seguridade Social discrepou co resto de partes sobre a indemnización que lle correspondía á institución e reclamou máis de 20.000 euros ao ter en conta que dúas das mulleres prostituídas se atopaban no establecemento nas dúas inspeccións e por iso pedía computar todo o período entre eses días, de febreiro a agosto. En cambio, o acordo entre a Fiscalía e as defensas reducía esa cantidade aos días de inspección. A sentenza establece que a indemnización sexa responsabilidade dos dous donos do local e non dun terceiro acusado que foi contratado por eles.

A semana pasada, nunha vista de conformidade, un dos acusados aceptou un ano de prisión e unha multa de 1.620 euros; outro seis meses de cárcere e unha sanción de 720 euros e o terceiro procesado, cinco meses de prisión e 480 euros de multa. A empresa do prostíbulo foi condenada á suspensión da actividade comercial por un período de cinco anos, aínda que xa se atopa extinta.

Dous dos procesados xestionaban o local a través dunha sociedade constituída en xaneiro de 2019, na que un era o administrador único e o outro era apoderado desde febreiro dese mesmo ano, xa que o seu socio vivía en Portugal. Ambos empregaron ao terceiro acusado, que recibía e contrataba verbalmente a mulleres para a prostitución, e encargábase de entregar porcentaxes e cobraba a clientes.

O 15 de febreiro de 2023, nunha inspección conxunta da Unidade Central de Redes de Inmigración e Falsidades Documentais e da Inspección Laboral, detectaron que os acusados non inscribiran na Seguridade Social a dez persoas, catro delas sen autorización de traballo e tres en situación irregular en España. A finais de agosto dese ano, outra inspección constatou que nove mulleres estranxeiras tampouco foran inscritas na Seguridade Social, das cales unha estaba en situación irregular e cinco carecían de permiso para traballar.

A empresa xa foi multada con máis de 40.000 euros por ocupación laboral a estranxeiros sen autorización para traballar.