A cidadanía arroupa as Forzas Armadas nun desfile máis curto e con ausencias

Milleiros de persoas arrouparon este domingo as Forzas Armadas no acto central do día da Festa Nacional, presidido polos Reis, que se desenvolveu sen incidentes, aínda que os ceos anubrados obrigaron a acurtar o desfile aéreo.

Á marxe deste pequeno cambio de guión, só os habituais pitos e apupos á chegada do presidente do Goberno, Pedro Sánchez, enturbaron a tradicional celebración do 12 de outubro coa que cada ano se homenaxean os 120.000 homes e mulleres que integran os distintos exércitos. 

Un total de 3.847 efectivos (524 son mulleres), ademais de aeronaves e vehículos motorizados, marcharon durante unha hora e media polos 1.540 metros do percorrido, desde a glorieta de Carlos V á praza de Colón.

Vinte aniversario da UME

Como novidades este ano, a parada militar conmemorou o vinte aniversario da Unidade Militar de Emerxencias (UME) e non contou coa emblemática Patrulla Águila, substituída pola Formación Mirlo.

A familia real ao completo

Pouco antes das 11:00 horas, os Reis chegaron á tribuna real, situada na praza de Cánovas del Castillo, e saudaron ás autoridades encabezadas polo presidente do Goberno, a ministra de Defensa, Margarita Robles, e o xefe de Estado Maior da Defensa (Jemad), o almirante Teodoro López Calderón.

Tamén formaron parte da liña de saúdo a presidenta da Comunidade de Madrid, Isabel Díaz Ayuso, e o alcalde da capital, José Luis Martínez Almeida.

Don Filipe e dona Letizia estiveron acompañados pola princesa Leonor, vestida co uniforme de gala como alférez alumna do Exército do Aire e do Espazo, e a infanta Sofía, que acode este ano ao acto despois de dúas edicións ausente por atoparse cursando os seus estudos en Gales.

O Goberno case en pleno asistiu ao desfile, salvo as ministras de Sanidade, Mónica García, e de Mocidade e Infancia, Sira Rego, de viaxe en Alemaña e Xordania, respectivamente; a de Igualdade, Ana Redondo, e o titular de Dereitos Sociais e Axencia 2030, Pablo Bustinduy.

Na tribuna de autoridades estaban os líderes dos partidos principais, entre eles, o do PP, Alberto Núñez Feijóo. Porén, o de Vox, Santiago Abascal, este ano decidiu seguir o desfile desde a rúa para non "branquear" o Goberno "corrupto e perigoso" de Sánchez.

Tampouco quixeron perder o desfile a cúpula militar, os presidentes do Congreso, Francina Armegol, e do Senado, Pedro Rollán; o defensor do pobo, Ángel Gabilondo; e os presidentes do CXPX, do Tribunal Supremo e do Constitucional.

Seis presidentes autonómicos ausentes

Como vén sendo habitual, non acudiu o lehendakari vasco, Imanol Pradales, e nesta ocasión tampouco os presidentes das Canarias, Fernando Clavijo, e da Rioxa, Gonzalo Capelán, ambos os dous por teren actos programados nas súas comunidades.

Tamén escusaron a súa presenza a presidenta das Baleares, Marga Prohens; o da Comunidade Valenciana, Carlos Mazón, e o de Murcia, Fernando López Miras, pendentes os tres da evolución da DINA Alice que afecta as súas comunidades.

Patrulla Acrobática de Paracaidismo

O salto da Patrulla Acrobática de Paracaidismo do Exército do Aire e do Espazo (Papea) inaugurou o acto. O sarxento primeiro Óscar Marsal, con máis de 3.300 lanzamentos, foi o encargado de portar a bandeira de España, de 24 metros cadrados de lonxitude e 15 quilos de peso, nunha manobra executada con precisión.

Actuou de guía o tamén sarxento primeiro José Carlos González, con máis de 3.000 saltos nos seus sete anos nesta patrulla. Por mor das condicións meteorolóxicas, a toma de terra non foi fronte á tribuna real senón na zona secundaria habilitada, un pouco máis afastada.

Estrea da Formación Mirlo

Ao izado da bandeira seguiu a homenaxe aos que deron a súa vida por España, na que o Rei e a princesa de Asturias depositaron unha coroa.

Cinco Pilatus PC-21 da Formación Mirlo estreáronse e sucaron os ceos de Madrid empregando por primeira vez os fumes de cor que simulan a bandeira nacional.

Estas aeronaves substituíron os C-101, coñecidos coloquialmente como culopollos, da Patrulla Águila, que se despediron despois de 40 anos de servizo e que deron paso ao desfile aéreo.

Dos 45 avións previstos, a cidadanía só puido ver cazas (Eurofighter, F-18, Harrier), apagalumes, avións de transporte ou os 29 helicópteros porque os ceos estaban completamente anubrados.

Pechouno a Formación Mirlo novamente soltando fumes coas cores da insignia nacional.

A UME e a Lexión, de novo as máis aplaudidas

Seguidamente, comezou o desfile terrestre co paso das unidades motorizadas encabezadas pola sección de motos da Garda Real. En total, 123 vehículos, 39 motos, 229 cabalos e 6 cans.

Unidades do Exército de Terra, da Armada e do Exército do Aire e do Espazo, así como efectivos de Garda Civil, da Unidade Militar de Emerxencias (UME), da Garda Real, Forzas e Corpos de Seguridade do Estado e diversos organismos de seguridade, Protección Civil e emerxencias marcharon perfectamente sincronizados.

Este ano a UME, unha das unidades máis aplaudidas, participou con dúas compañías, en lugar da única habitual, co gallo dos 20 anos da súa creación.

Antes das unidades montadas, efectivos do terzo "Gran Capitán" 1º da Lexión, outra das que espertan maior entusiasmo, desfilaron acompañados da súa mascota, este ano un cordeiro macho de tres anos, Baraka, que en árabe significa "boa sorte".

Alcaldes afectados pola DINA

Unha vez finalizada a parada militar, os Reis, a princesa de Asturias e a infanta Sofía trasladáronse ao Palacio Real para a tradicional recepción ás altas autoridades do Estado e a representantes do mundo político, económico, social e cultural.

Este ano foron convidados ao redor de medio cento de alcaldes dos municipios das zonas afectadas pola DINA, que azoutou principalmente a Comunidade Valenciana e Castela-A Mancha, fai agora case un ano.