A Asociación Española Contra o Cancro é a ONG que máis cartos destina á investigación
AECC, presente e máis de 500 proxectos, en que ten comprometidos 100 millóns de euros, inicia a súa campaña de colecta anual
Hoxe vémolos na rúa, vestidos de verde. Son máis de 700.000 socios en España e, entre as cotas e a colecta, conseguen cada ano darlle un impulso á investigación.
"O ano pasado foron 25 millóns e medio de euros en 195 proxectos. A xente que coa súa xenerosidade nos achega fondos pois que saiba tamén en que se gastan eses cartos", explica Carlos Lamora, vicepresidente da AECC na Coruña.
Ofrecen aos pacientes servizos como fisoterapia, apoio psicolóxico e social. Pero destacan sobre todo o apoio ao esforzo investigador.
"O tratamento co cancro nos últimos 20 anos cambiou radicalmente. Agora dispoñemos de tratamentos dirixidos e inmunoterapia, novas terapias que fan que teñamos unha supervivencia global en cancro de máis do 60 % en mulleres e máis do 50 % en homes", informa María Mayán, investigadora do INIBIC.
"Que se conciencie a xente de que poñendo, aínda se sexa pouco diñeiro, a importancia que ten para a investigación. Eu, por exemplo, que son paciente, vexo como podo acceder a eses avances, e iso é grazas aos recusos económicos", engade Vanesa Marzábal.
O obxectivo é que o cancro sexa, grazas á investigación, unha enfermidade curable ou crónica. O seguinte chanzo, que xa ven alcanzable: un 70 % de supervivencia antes de 2030.
