Os médicos paran por cuarta vez este ano co conflito con Sanidade encallado

Médicos de toda España están chamados este luns á súa cuarta folga semanal do ano ante a falta de avances co Ministerio de Sanidade, que acusa os sindicatos convocantes de aliñarse coa dereita para perpetuar o conflito en busca de fins distintos aos de mellorar as condicións do colectivo.

O novo paro de batas brancas arrinca hoxe sen apenas novidades respecto ao anterior, celebrado a última semana de abril, co conflito en punto morto e a esixencia por parte do comité de folga de que interveña o presidente do Goberno, Pedro Sánchez, petición á que se sumaron PP e PNV.

Xornada de folga e concentracións en Galicia contra o Estatuto Marco

A Consellería de Sanidade cifra nun 15,38 % o seguimento, na quenda da mañá, da folga de médicos convocada a nivel nacional contra o Estatuto Marco promovido polo Ministerio de Sanidade. O sindicato O'Mega elevou a participación ata o 81 %.

Segundo fontes sanitarias, o seguimento do paro nos sete grandes hospitais públicos galegos foi do 21,41 % mentres que nos hospitais comarcais foi do 11,20 %. No seu conxunto, a participación en centros hospitalarios foi do 20,55 %. No caso da Atención Primaria, o seguimento foi cifrado no 2,09 % nesta quenda de mañá.

Por hospitais, o que rexistrou unha maior adhesión ao paro na mañá deste luns foi o Álvaro Cunqueiro de Vigo, cun seguimento do 26,82 %; seguido polo CHUAC, co 24,27 %. Nos comarcais, o maior seguimento foi no hospital do Salnés, cun 24 %. O seguimento máis alto na Atención Primaria foi en Ferrol, cun 3,82 %, seguida da área sanitaria de Vigo (3,38 %).

Coincidindo con esta xornada de folga, houbo concentración de médicos ás portas do hospital Álvaro Cunqueiro de Vigo.

A portavoz do colectivo, Catalina Fernández, reiterou que os profesionais reclaman un estatuto propio porque, desde 2023, non contan con representación acorde co peso da súa profesión. 

Tamén lembrou que os médicos son os únicos que están obrigados a ter xornadas complementarias (gardas) de 17 ou 24 horas "que non contan como tempo traballado nin para a xubilación nin para a carreira profesional e que, ademais, páganse por baixo da hora ordinaria".

"O que queremos é ter unha xornada normal e que todo o resto das horas sexan horas extraordinarias", explicou.

En relación ao acordo alcanzado en Galicia, valorou que é "revolucionario" porque se conseguiu que a Xunta "se posicione claramente a favor dunha norma propia ou específica para os médicos", o que supón "a antesala dun futuro marco propio para os médicos en España".

Sanidade defende o Estatuto Marco

Desde Sanidade, a súa titular, Mónica García, defende que o Estatuto Marco que critican os médicos mellora as súas condicións, por exemplo, reducindo as gardas de 24 a 17 horas, con días de libranza antes e despois, ou establecendo xornadas máximas semanais de 45 horas fronte ás 48 que marca a lexislación europea.

Así figura no acordo que pechou tras máis de tres anos de negociación cos sindicatos da mesa do ámbito do estatuto marco -CCOO, UXT, CSIF, Satse-FSES e CIG Saúde-, organizacións que comparten que a gran maioría de reivindicacións médicas están xa nese documento.

Outras, como o prezo das gardas, a xornada de 35 horas ou a xubilación, ou non son competencia do Ministerio ou non teñen cabida nunha lei como o Estatuto Marco.

O comité de folga pide un estatuto propio

Pero os sindicatos do comité de folga -Confederación Española de Sindicatos Médicos (CESM), Sindicato Médico Andaluz (SMA), Metges de Catalunya (MC), Asociación de Médicos e Titulados Superiores de Madrid (Amyts), Sindicato Médico de Euskadi (SME) e o Sindicato de Facultativos de Galicia Independentes (O’MEGA)- insisten en esixir un estatuto propio.

Esixencia que, por agora, só secunda Vox, e en abrir unha vía de negociación exclusiva con Sanidade na marxe das organizacións da mesa.

Ao longo de múltiples reunións formais e informais celebradas estes meses, Sanidade tratou de buscar solucións propoñendo a mediación das asociacións de pacientes ou o Foro da Profesión Médica, ao que se negaron de plano os folguistas.

Expuxo ademais a creación de mesas de negociación específicas no ámbito das comunidades, pero tamén foi rexeitada.

É por todo iso que García cre que, tras todos os intentos por resolver a situación, e tras máis dun sinal de que así ía ser, o comité está interesado en perpetualo porque está a ser utilizado "de xeito instrumental" polos partidos de dereita, sobre todo o PP, para desestabilizar o Goberno.

A folga, por territorios

Así, os médicos volverán ás rúas, xa sexa secundando a folga estatal ou a autonómica que programaron paralelamente as respectivas delegacións autonómicas sindicais. O seguimento das precedentes foi similar, con cifras que oscilaron entre o 5 e o 20 %, segundo as consellarías, elevadas ao 60 % polos sindicatos.

Varios paros autonómicos, como o de Galicia, foron suspendidos tras os acordos alcanzados entre os sindicatos médicos autonómicos e as súas respectivas consellarías en materias competenciais das comunidades, como as retributivas.

Mentres, en Madrid, Amyts mantívoo tras unha "curta e decepcionante" reunión coa conselleira e CESM fixo o propio en Aragón e Comunidade Valenciana.

Con todo, desde mañá e ata o venres sucederanse as protestas en toda España, co mércores 20 como día central, con varias manifestacións programadas, como en Bilbao, Vigo ou Valencia; e distintas concentracións como a que se celebrará fronte ao Ministerio.