Publicador de contidos

Publicador de contidos

Os EUA sancionan por narcotráfico unha banda de moteiros con líder galego

Os EUA sancionan por narcotráfico unha banda de moteiros con líder galego

Cren que teñen unha alianza estratéxica co Cártel Jalisco Nueva Generación, o Clan do Golfo, o Cártel de Sinaloa e a organización ecuatoriana Los Choneros

G24.gal 19/11/2026 19:25

O Goberno dos Estados Unidos sancionou este xoves por tráfico de drogas e por proporcionar apoio ao narcotráfico mexicano a banda de moteiros australiana coñecida como os Comancheros, incluído un dos seus líderes mundiais, o galego Alexandre Varela Villar.

A Oficina de Control de Activos Estranxeiros (OFAC) do Departamento do Tesouro tamén anunciou sancións polo mesmo motivo contra a 'Ndrangheta, a coñecida mafia orixinaria de Calabria, no sur de Italia.

O Goberno estadounidense considera que o Club Motociclista Comanchero mantén unha alianza estratéxica co Cártel Jalisco Nueva Generación, o Clan del Golfo, o Cártel de Sinaloa e a organización ecuatoriana Los Choneros, considerada unha filial deste último cártel mexicano.

Segundo asegura a OFAC nun comunicado, os Comancheros "enviaron centos de quilogramos de cocaína desde Sudamérica cara aos Estados Unidos, Australia e Europa" e están implicados noutras actividades delituosas, "como asasinatos, tráfico de armas e branqueo de capitais" en case unha vintena de países de América, Europa, Asia e Oceanía.

O Tesouro sanciona tamén a Varela Villar, nacido en Pontevedra e coñecido como "Alex Vare" ou "Vare", a quen sinala como "comandante mundial" dos Comancheros con base en España.

As sancións implican o bloqueo dos seus bens e intereses patrimoniais nos Estados Unidos, así como a prohibición de que persoas ou entidades baixo xurisdición estadounidense participen en calquera tipo de transacción con el.

A OFAC tamén sanciona o "presidente mundial dos Comancheros, con sede en Australia", Allan John Norman Meehan, e a Pasilika Naufahu, "presidente nacional" da filial neozelandesa da banda, fundada en Sidney en 1968 e considerada en Australia unha das agrupacións de motociclistas máis poderosas e temidas.

Pola súa banda, Washington considera que a 'Ndrangheta controla "unha parte importante do comercio europeo de cocaína" e afirma que colabora co cártel de Sinaloa, o Cártel Jalisco Nueva Generación e o Clan del Golfo.

Ademais de sancionar a propia organización, inclúe seis membros e dirixentes da súa rede canadense, así como a esposa e os fillos dun deles, Luigi Vescio, e sinala catro empresas familiares.

Publicidade
Publicidade
Publicidade
Publicidade