Os EUA e os hutís asinan un alto o fogo no mar Vermello

Este martes os EUA e os hutís do Iemen anunciaban un alto o fogo no mar Vermello acadado a través da mediación de Omán. Os EUA limita o acordo ao mar Vermello polos riscos para a navegación e o fluxo comercial, mentres os hutís reivindican o pacto como un triunfo da súa posición de apoio ao pobo palestino.

A portavoz do Departamento de Estado dos EUA, Tammy Bruce, especificou que o acordo se limita ao mar Vermello e negouse a comentar un posible pacto similar entre os rebeldes iemenís e Israel. Sobre a mesma cuestión, o presidente dos EUA, Donald Trump, limitouse a dicir "se algo pasa entre Israel e os hutís, xa o discutiremos".

Bruce indicou que desde que se iniciou a resposta dos EUA aos rebeldes iemenís "quedou claro que ía continuar esa operación ata que os hutís deixasen de atacar os buques nese escenario".

"Tivemos un éxito tremendo o último mes. E, como saben, estamos a confiar na palabra dos hutís, pero xa non querían máis, e enténdoo, e decidiron que xa non queren seguir con isto", dixo Trump.

O líder republicano anunciou este martes que os EUA deixará de bombardear aos rebeldes hutís do Iemen porque, segundo apuntou, estes decidiron "capitular" e frear os seus ataques no mar Vermello nun acordo mediado por Omán.

Trump apuntou que informara xa o Exército da decisión e que "toda acción se detén".

"Algúns probablemente non se decataron aínda. Hai varias persoas en lugares estratéxicos, pero a estas alturas case todos deberían sabelo. Os ataques deteranse en ambos os sentidos", dixo o presidente na cerimonia de xuramento do enviado especial para Oriente Medio, Steve Witkoff.

Pola súa banda, os hutís defenden este acordo como una vitoria da súa postura de apoio a Palestina, que tivo que ser "aceptada" polos estadounidenses.

Así o indicou a pasada madrugada en declaracións á televisión Al Masirah, controlada polos hutís, o principal líder negociador do grupo Mohamad Abdelsalam, quen sinalou ademais que o acordo foi froito "do claro fracaso da agresión estadounidense ao Iemen", e que xurdiu expresamente de "un pedido americano trasladado a través de Omán".

"Os esforzos feitos polo ministro de Exteriores omaní cos americanos resultaron na súa aceptación da postura iemení de continuar apoiando ao pobo palestino", afirmou Abdelsalam, quen defendeu que os rebeldes non fixeron concesións nas súas conversacións cos EUA.

"A nosa posición permanece sen cambios. Unha clara e firme posición de apoio ao pobo palestino e de resposta á agresión", dixo Abdelsalam. 

Nese sentido, subliñou que o cesamento do fogo non afecta as operacións do grupo contra Israel, incluídas as súas actividades no mar Vermello, e insistiu en que os EUA fracasaron nos seus intentos de "danar" o seu apoio ao pobo palestino.

"Non puideron impoñer un fin ás operacións iemenís contra Israel, xa sexa no mar Vermello ou mesmo ataques á entidade sionista na Palestina ocupada. Este acordo non ten conexión algunha coa nosa posición sobre Israel", asegurou.

Ademais, Abdelsalam apuntou que o acordo supón "un éxito importante", xa que "fortalece a posición en que Israel permanece illado enfrontando unha ampla oposición militar e popular hoxe liderada por Iemen".

O negociador iemení instou os EUA a que cumpran co acordado, e indicou que os hutís aínda seguen avaliando a situación, polo que "se os americanos incumpren co acordado de calquera xeito, a nosa resposta está lista".

A Chancelería omaní, que actuou de mediadora para acadar este acordo, expresou a súa "gratitude" a ambas as partes polo seu "estilo construtivo" que conduciu a este "resultado positivo".

Washington iniciou hai máis dun ano unha campaña de bombardeos contra os hutís en represalia polos seus ataques contra a navegación nesta estratéxica vía marítima, pero esta operación intensificouse o pasado 15 de marzo por orde do presidente estadounidense, Donald Trump.