Os EUA atacan unha nova lancha no Pacífico en pleno debate sobre a legalidade das operacións

As forzas armadas dos Estados Unidos publicaron este xoves un vídeo dun novo ataque contra unha lancha supostamente ligada ao narcotráfico no Pacífico Oriental, no medio da controversia no Senado pola legalidade destas operacións militares da Administración Trump contra buques deste tipo e os seus tripulantes.

O ataque, que acontecería este mesmo venres, foi anunciado polo Comando Sur na súa conta oficial de X e presentado como parte das operacións da ofensiva Lanza do Sur e provocou a morte de catro tripulantes, descritos como "narcoterroristas" polo exército.

A publicación afirma que a orde do ataque foi dada polo secretario de Guerra Pete Hegseth, quen se atopa no ollo do furacán mediático logo de que o Washington Post revelase que en setembro as forzas estadounidenses ordenaron un segundo ataque contra unha embarcación no Caribe para eliminar dous sobreviventes dun primeiro disparo.

As forzas armadas non deron detalles da organización criminal que supostamente operaba o bote nesta ocasión.

Con esta xa son 25 as embarcacións afundidas nestas operacións militares e 87 as persoas falecidas.

Este xoves, o almirante Frank Bradley compareceu nunha reunión a porta pechada co Comité de Forzas Armadas do Senado que investiga a legalidade das accións militares da campaña antinarcóticos do presidente Donald Trump.

Trump asegurou esta semana que se preparan para iniciar operacións en territorio venezolano para eliminar obxectivos ligados ao narcotráfico.

A campaña de Trump preto de Venezuela e Colombia deixou polo menos 80 mortos e xa tivo resposta a través de accións legais por posibles violacións de dereitos humanos, como a demanda ante a Comisión Interamericana de Dereitos Humanos que o avogado do presidente colombiano Gustavo Petro presentou pola posible execución extraxudicial dun pescador no Pacífico durante unha das operacións estadounidenses.