A Casa Branca estuda a compra de Groenlandia e anuncia unha xuntanza con Dinamarca a vindeira semana

A Casa Branca insistiu este mércores en que a diplomacia é a primeira opción do presidente estadounidense, Donald Trump, para tomar o control do territorio autónomo danés de Groenlandia, aínda que sen descartar outros escenarios como unha acción militar, e anunciou unha reunión a próxima semana con representantes de Dinamarca para tratar o tema.

“Para o presidente Trump, todas as opcións sempre están enriba da mesa mentres avalía que é o que máis convén aos intereses dos Estados Unidos, pero quero recalcar que a primeira opción do presidente sempre foi a diplomacia”, declarou a portavoz da Casa Branca, Karoline Leavitt, preguntada por se os EUA contemplan accións militares en Groenlandia.

Leavitt dixo que, desde o século XIX, varios presidentes estadounidenses barallaron a anexión da illa como “beneficiosa para a seguridade dos EUA”.

“O presidente foi moi franco e claro con todos vostedes e co mundo ao afirmar que considera que o mellor para os intereses dos Estados Unidos é disuadir a agresión rusa e chinesa na rexión do Ártico, e por iso o seu equipo está a debater actualmente como podería levarse a cabo unha posible compra”, recalcou a portavoz.

O xefe adxunto de Gabinete da Casa Branca, Stephen Miller, e a propia Leavitt non descartaran esta semana a posibilidade de enviar forzas armadas para anexionar a illa, ao contrario do que fixera onte o enviado especial de Trump para este territorio ártico, Jeff Landry, que defendeu a súa independencia con acordos económicos con Washington.

A vía diplomática intensificarase a próxima semana en Washington cunha reunión coa diplomacia danesa, confirmou  nos corredores do Capitolio o secretario de Estado dos EUA, Marco Rubio, quen rexeitou facer máis comentarios sobre a cuestión.

O ministro danés de Exteriores, Lars Løkke Rasmussen, informara este martes de que solicitara unha reunión con Rubio e de que era necesario aclarar algúns “malentendidos”, como que Dinamarca descoidara a defensa da illa ou que esta se atope chea de barcos chineses.

Rasmussen salientou  que Dinamarca non pode acceder á petición estadounidense de lle entregar Groenlandia, polo que pediu “respecto” para o que considera unha “liña vermella”.

Está previsto que na reunión cos EUA participe tamén a conselleira de Asuntos Exteriores do Goberno autónomo de Groenlandia, Vivian Motzfeldt.

“A miña principal mensaxe será que Groenlandia precisa os Estados Unidos e os Estados Unidos precisan Groenlandia no que se refire á seguridade no Ártico”, dixo Motzfeldt ao diario dixital groenlandés Sermitsiaq.

Motzfeldt quere saber “por que era necesario que os Estados Unidos fixesen unhas declaracións tan agresivas para que de agora en diante non haxa malentendidos: somos amigos e aliados”.

A oficina da primeira ministra danesa, Mette Frederiksen, anunciou tamén este mércores que a semana que vén manterá unha reunión sobre a relación cos Estados Unidos cos líderes dos partidos políticos daneses e cos catro deputados dos territorios autónomos (Groenlandia e as Illas Feroe).

Apoio europeo, Francia defende un dispositivo de disuasión

Os ministros de Exteriores dos tres países que conforman o chamado Triángulo de Weimar (Francia, Alemaña, Polonia) reiteraron o seu apoio a Dinamarca, un día despois de que fixesen o propio os líderes de seis países europeos, entre eles España.

“Groenlandia non está á venda e non se compra”, subliñou o ministro de Exteriores francés, Jean-Noël Barrot, nunha conferencia de prensa conxunta cos seus homólogos alemán, Johan Wadephul, e polaco, Radoslaw Sikorski.

Mentres os dous últimos adoptaron un ton máis conciliador, Barrot insistiu en que “Dinamarca pode contar coa solidariedade da Unión Europea”, tras lembrar que Francia iniciou “reflexións” que ten intención de compartir cos seus socios comunitarios, sobre a forma de defender os seus intereses “se estivesen ameazados”, nunha alusión directa ás manifestacións sobre Groenlandia de Trump.

Barrot engadiu que se trataría de poñer en pé un dispositivo “para disuadir calquera forma de ameaza aos seus intereses”, pero evitou falar de “represalias”, como fixera horas antes cando anunciou esa iniciativa.

Ao ser preguntada por unha posible intervención militar estadounidense en Groenlandia, a portavoz do Ministerio de Exteriores chinés, Mao Ning, limitouse a sinalar que “a parte chinesa avogou de forma consistente por xestionar as relacións entre Estados de acordo cos propósitos e principios da Carta da ONU”, sen entrar en máis detalles.

Groenlandia ten unha poboación duns 57.000 habitantes nun territorio de 2,1 millóns de quilómetros cadrados (o 80 % cuberto de xeo de forma permanente) e depende dos ingresos da pesca e da axuda económica anual de Dinamarca, que cobre preto da metade do seu orzamento.