Cinco españois, entre os presos liberados por Venezuela para "consolidar a paz e a convivencia pacífica"

O presidente do Parlamento venezolano e xefe negociador do chavismo, Jorge Rodríguez, anunciou este xoves a liberación de "un número importante de persoas", que inclúe venezolanos e estranxeiros -sen precisar a cifra-, como un xesto para "consolidar a paz e a convivencia pacífica" no país.

Rodríguez, irmán da presidenta encargada de Venezuela, Delcy Rodríguez, indicou que "este proceso de excarceración" está "a ocorrer desde este mesmo momento" e agradeceu ao exxefe do Goberno español José Luis Rodríguez Zapatero, así como ao mandatario de Brasil, Luiz Inácio Lula da Silva.

Tamén ao Reino de Qatar e "especialmente" ás institucións do Estado, que -engadiu- "atenderon ao chamado" da presidenta encargada de Venezuela, quen ocupa o cargo tras a captura do mandatario Nicolás Maduro por parte dos Estados Unidos.

"Considérese este xesto do Goberno bolivariano de ampla intención de busca da paz como a achega que todos e todas debemos facer para lograr que a nosa república continúe a súa vida pacífica e en procura da prosperidade", afirmou Rodríguez, nunha comparecencia  ante a prensa transmitida pola canle estatal Venezolana de Televisión,

Ademas, asegurou que non se falou con "ningún sector extremista", con adoita chamar aos líderes do maior bloque opositor, ao sinalar que "eles son a negación da política".

"Nós estamos a falar coas institucións políticas, cos partidos políticos e coas organizacións con fins políticos que acaten e se ateñan ao que está establecido na Constitución", precisou o xefe do Parlamento, quen reiterou que as excarceracións son un "xesto unilateral" do Goberno.

O fiscal xeral de Venezuela, Tarek William Saab, dixo este xoves que o anuncio da excarceración de presos políticos no país revela a “vontade” do Estado venezolano, encabezado pola presidenta encargada, Delcy Rodríguez, de buscar un “clima de paz” e “unha convivencia pacífica”.

Este anuncio dáse cinco días despois do ataque militar dos Estados Unidos en territorio venezolano que terminou coa captura de Maduro e da súa esposa, Cilia Flores.

Segundo o último boletín da ONG Foro Penal, no país hai 863 presos políticos, entre eles 86 estranxeiros ou con dobre nacionalidade, aínda que a posición do Goberno de Venezuela é que están encarcerados pola "comisión de terribles feitos punibles".

O Goberno de España confirma a identidade dos cinco españois liberados

O Goberno confirmou este xoves a liberación en Venezuela de cinco cidadáns españois, entre eles una con dobre nacionalidade, e cualificou de "paso positivo" o dado polo Executivo que encabeza Delcy Rodríguez.

"O Goberno de España saúda a liberación hoxe en Caracas de cinco españois, un deles cidadá con dobre nacionalidade, que se preparan a viaxar rumbo a España asistidos pola nosa Embaixada en Caracas", informou o Ministerio de Asuntos Exteriores nun comunicado.

Nel, o Executivo trasladou "a súa alegría a estes cidadáns, os seus familiares e amigos" por esta liberación, que se enmarca nunha máis ampla de presos venezolanos e doutras nacionalidades, e precisou que o titular de Exteriores, José Manuel Albares, "puido falar con todos eles persoalmente".

"España, que mantén relacións fraternais co pobo venezolano, recibe esta decisión como un paso positivo na nova etapa na que se atopa Venezuela", manifestou o Goberno, en liña co que pouco antes dixera o propio Albares en declaracións a unha televisión.

O ministro de Asuntos Exteriores; José Manuel Albares, precisou que os liberados son os vascos Andrés Martínez Adasme e José María Basoa Valdovinos, detidos en setembro de 2024 por presuntamente participar nun complot contra Maduro; o mariño canario Miguel Moreno Dapena, detido o pasado xuño mentres buscaba pecios afundidos en augas venezolanas, e Ernesto Gorbe Cardona, quen foi detido en decembro de 2024.

— Viva la UCV (@VivaLaUCV) January 8, 2026

Ademais, indicou, foi liberada a hispano-venezolana Rocío San Miguel, defensora de Dereitos Humanos e presidenta da organización Control Cidadán, quen foi detida en febreiro de 2024 cando tentaba saír do país.

 

"Un acto de xustiza"  e un paso cara a reconciliación

O presidente do Goberno celebrou a liberación de cinco españois por parte de Venezuela tras a intervención militar dos Estados Unidos e considerou que supón un paso cara á reconciliación no país.

"Celebramos a liberación dos españois que pasaron máis dun ano retidos en Venezuela", escribiu Sánchez nunha mensaxe na rede social X, despois de que Exteriores confirmase a posta en liberdade de cinco cidadáns, incluída unha con dobre nacionalidade.

— Pedro Sánchez (@sanchezcastejon) January 8, 2026

"É un acto de xustiza e un paso necesario para impulsar o diálogo e a reconciliación entre os venezolanos", valorou o presidente do Goberno, que non dubidou en cualificar nos últimos días de violación do Dereito Internacional a captura por parte de Washington do presidente venezolano, Nicolás Maduro.

 

Feijóo esixe a liberación de todos os presos políticos

O líder do PP destacou que a liberación de presos "vai na boa dirección" para lograr unha Venezuela libre e esixiu a liberdade de todos os represaliados políticos.

Escribiuno na súa conta da rede X tras confirmar o Ministerio de Asuntos Exteriores a posta en liberdade de cinco españois dentro do "número importante" de persoas encarceradas.  Feijóo enxalzou que "en poucos días descabezouse o réxime chavista e os presos políticos comezan a saír do cárcere".
 

— Alberto Núñez Feijóo (@NunezFeijoo) January 8, 2026

Así mesmo, afirmou: "Vaise na boa dirección para lograr a Venezuela libre pola que durante tantos anos loitamos e non pararemos ata que sexa unha realidade completa".

"Esiximos a liberdade", concluíu a súa mensaxe Feijóo pare insistir na necesidade de que todos os presos políticos sexan liberados dos cárceres venezolanos.

Familiares dos presos políticos, á expectativa

Os familiares dos presos políticos están á expectativa sobre as liberacións anunciadas polo presidente do Parlamento, á vez que pediron claridade sobre cantos destes detidos recibirán a medida.

"É importante reiterar e lembrar que ata o de agora non obtivemos unha lista oficial cos nomes e os apelidos e as cédulas de identidade das persoas que foron excarceradas", sinalou aos medios o activista Diego Casanova da ONG Comité pola Liberdade dos Presos Políticos.

Casanova indicou que reina a "opacidade" o que, ao seu xuízo, xera unha maior incerteza entre os familiares.

"Nós imos seguir insistindo en que teñen que ser excarcerados, teñen que ser liberados sen ningún tipo de condicións todos os presos políticos", agregou.

Pola súa banda, Martha Cambero, esposa do politólogo e disidente do chavismo Nicmer Evans, detido en decembro pasado, sinalou que os funcionarios policiais argumentaron que deben esperar ao aviso de excarceracións para que os presos políticos poidan saír dos cárceres.