Os estudantes franceses manterán as súas protestas malia as concesións do Goberno de Macron

Os estudantes franceses anunciaron este luns que manteñen as protestas que principiaron hai tres semanas contra o Executivo, tras ser recibidos polo primeiro ministro, Sébastien Lecornu, que deu algunhas concesións as súas reivindicacións, que eles consideraron insuficientes.

Tras varias reunións de contacto, e despois de promover unha plataforma de consulta cos estudantes de institutos, cuxas mobilizacións foron o detonante dunha protesta que se trasladou a outros sectores, o Goberno francés anunciou unha serie de medidas, como a reforma do sistema de acceso á universidade, 1.000 millóns de euros para mellorar os edificios universitarios e outros 4.000 millóns en forma de créditos para colexios e institutos.

As propostas do Executivo francés son "insuficientes" para os estudantes 

"É un paso, pero claramente insuficiente. Hai que ir máis lonxe", asegurou o portavoz da asociación Lles Lycéens, Louis Letoubon, que xunto aos seus colegas apelou a unirse ás manifestacións programadas para o vindeiro sábado, continuar cos bloqueos de institutos a partir do próximo luns, cando acaban as vacacións escolares, e sumarse á folga xeral programada para o próximo día 5.

Convertido nun dos rostros visibles da protesta estudantil, Letoubon asegurou que "o Goberno ten medo, demostrou que está desorientado" polo que apelou a proseguir a presión "para obter o máximo".

Un acceso universitario máis transparente

A proposta do Executivo, debullada polo ministro de Educación, Edouard Geffray, inclúe unha reforma parcial do sistema de acceso á universidade que os estudantes de instituto queren derrogar totalmente.

O Goberno propón para este mércores un debate parlamentario sobre ese sistema, convencido de que o seu futuro recaerá no Executivo que saia das urnas das presidenciais de abril-maio próximo.

Os estudantes consideran que pode ser un xeito de avanzar, sabedores de que os partidos mellor situados nas sondaxes, a ultradereitista Agrupación Nacional de Marine Le Pen e a esquerdista A Francia Insubmisa de Jean-Luc Mélenchon, apostan por derrogar o actual sistema, pois consideran que é pouco comprensible e transparente, ademáis de xerar unha elite e non favorecer o ascenso social dos alumnos das zonas máis desfavorecidas.

Os sindicatos estudiantís consideran escasa a achega para renovar as instalacións educativas 

Sobre a achega económica para a renovación de edificios educativos, os estudantes opinan que a cantidade está moi lonxe do que necesitan e lembran que boa parte dos institutos do país non están preparados para as temperaturas actuais.

Geffray asegurou tamén que reducirán o número de alumnos por clase para situalo en 28, unha medida que se aplicará a partir do próximo curso na metade deles, os situados nas zonas máis deprimidas, e o seguinte o resto.

Nese sentido, anunciou que renunciarán á supresión de 836 postos de docentes que anunciaran e que crearán 500 suplementarios.

A contratación de docentes é o punto con posturas máis afastadas 

Un dos puntos nos que as concesións do Executivo coas reivindicacións estudantís pareceron máis afastadas foi a contratación de docentes universitarios. Os sindicatos reclaman 250.000 e o Goberno anunciou 15.000, dedicados esencialmente a disciplinas profesionais.

Outra das medidas anunciadas será elevar anualmente a dotación de bolsas en virtude da inflación.