Trump afirma sen probas que cre que houbo unha "fraude" na vitoria electoral de Lula no Brasil
O derrotado tamén se negou a recoñecer a vitoria de Lula e anunciou que solicitará ante a Xustiza a "anulación" dos comicios
O pai de Flavio, Jair Bolsonaro, foi condenado a 27 anos de cárcere pola súa paticipación nun intento de golpe de Estado ao non recoñecer a vitoria de Lula xa no 2022 e fuxiu aos Estados Unidos
Lula gaña as eleccións no Brasil tras unha remontada inédita: "Gañou a democracia"
REUTERS/Jonathan Ernst
O presidente dos Estados Unidos, Donald Trump, afirmou este luns sen achegar ningunha proba que o respalde que houbo unha "fraude" nas eleccións de Brasil, nas que o mandatario Luiz Inácio Lula da Silva se impuxo o domingo ao ultradereitista Flávio Bolsonaro.
O vencido nas eleccións, Flavio Bolsonaro, tampouco recoñeceu a súa derrota.
"Sinceramente, non tomei partido, pero a imaxe que deu é pésima. Non apoiei a ninguén nin respaldei nada. Pero vin as eleccións e parecían moi, moi corruptas", engadiu Trump.
Lula impúxose o domingo na segunda volta das eleccións presidenciais e obtivo un cuarto mandato ao derrotar contra prognóstico a Flávio Bolsonaro, fillo do expresidente Jair Bolsonaro, que gañara a primeira volta do 4 de outubro.
Tras coñecerse o resultado, Bolsonaro negouse a recoñecer a vitoria de Lula e anunciou que solicitará ante a Xustiza a "anulación" dos comicios pola decisión xudicial que ampliou en dúas horas o horario de votación en todo o país, en resposta a unha petición da campaña do mandatario electo.
O pai de Flavio Bolsonaro, Jair Bolsonaro, foi condenado en 2025 pola corte suprema de Brasil a máis de 27 anos de cárcere por un intento de golpe de Estado para manterse no poder tras ser derrotado por Lula no 2022 e refuxiose nos Estados Unidos
A vitoria de Lula supón un revés para os plans de Trump de estender a influencia de Washington en Latinoamérica mediante gobernos de dereita aliñados coa súa axenda.
Aínda que Trump non apoiou abertamente a Flávio Bolsonaro, si lle dedicou xestos como recibilo en maio no Despacho Oval, unha honra pouco habitual para un senador estranxeiro.
Desde o seu regreso ao poder, Trump aumentou a presión sobre o Goberno de Lula e impuxo o ano pasado elevados aranceis a Brasil en resposta ao proceso xudicial contra Jair Bolsonaro, aliado do republicano durante o seu primeiro mandato, que foi condenado por intentar dar un golpe de Estado.
