Os concellos reclaman que o Estado e a Xunta financien o 100% da dependencia

O  presidente da Federación Galega de Municipios e Provincias (FEGAMP)  afirma que o financiamento é a principal materia pendente dos concellos.

Na entrevista do domingos da Radio Galega, Alberto Varela  reclamou que non se exclúa aos concellos do debate sobre  o financiamento autonómico.

"Os concellos non podemos quedar co que sobre desa repartición. Non é razoable porque   cada vez xestionamos máis competencias públicas"

O tamén alcalde de Vilagarcía suliñou que os municipios  deben contar cun financiamento estable e cunha previsión do que van recibir do Estado e da Xunta  para prestar servizos de calidade.

"Nos últimos anos  a participación nos ingresos do Estado foi aumentando aínda que sempre queremos máis.  A nivel de Galicia,  pedímoslle á  Xunta que incremente o Fondo de Cooperación Local porque leva  dez anos  na mesma contía: 112 millóns para  313 concellos".

O responsable da FEGAMP tamén reclamou  clarificar as competencias que deben asumir os concellos e as deputacións.

"Sobre o  papel a función  das deputacións  é axudar ós concellos  máis pequenos. Eu vexo que hai  diferenzas entre unhas deputacións e outras e cada unha decide a súa liña. Cre que hai que facer unha reflexión sobre o seu papel no futuro. Hai que clarificar as competencias dos concellos e das deputacións".

Alberto Varela cifrou en  600 millóns o déficit dos concellos galegos pola prestación de servizos que "son competencia doutras administracións" pero que xestionan por  seren a administración máis próxima.  Entre eses servizos está o de  Axuda no Fogar, o SAF,  que, segundo explicou, é o máis demandado.

"A Lei da Dependencia establece  calaramente que ten que ser financiado ó 100% polo Estado e pola Xunta. A realidade é que somos  os concellos os que estamos facendo un esforzo  maior para que este este servizo (o SAF ) saia adiante.  O que pedimos é que se cumpra a lei"

O presidente da FEGAMP engadiu que  están en negociacións coa consellería de Política Social e que solicitaron unha reunión co ministro de Dereitos Sociais   que aínda non se produciu.

Alberto Varela   denunciou que o custo medio do servizo  en Galicia é de "24 ou 25 euros á hora" pero que  reciben  12 euros   entre o Estado e a Xunta. A isto hai que engadir o copagamento dos usuarios  "que é mínimo".

"A conta é bastante simple. É dicir, estamos poñendo nós   case a metade, un pouco menos, o 40%  porque co copagamento é un corenta e pico. Ningunha das dúas dúas administracións (Xunta e  Estado) cumpre coa parte que lle toca.  A  Lei de Dependencia  di que a comunidade ten que poñer, cando menos, o mesmo que o Estado: cando menos a Xunta tería que poñer 12 euros e o Estado outros 12"

Fusións

O rexedor de Vilagarcía e presidente da FEGAMP cre que  o debate sobre a fusión dos concellos non está dando resultado.  

"As fusións son  moi difíciles. Cada concello ten a súa identidade, o seu nome.  É difícil poñerse dacordo en cousas tan simples como as festas locais. Creo que  bater contra ese muro é perder o tempo"

Pola contra,  Varela aposta por outras vías como mancomunar servizos.

"Moitas mancomunidades funcionan  moi ben. Hai servizos  nos que os concellos máis pequenos se poden axudar. Creo que debemos explorar esta vía  máis que falar de fusionar concellos".

Noutra orde de cousas,  o responsable da FEGAMP referiuse ó clima político actual. Alberto Varela aposta polo diálogo e o entendemento e pide  " un pouco de mesura" nun momento  no que "a política e a sociedade están tan tensionados e polarizados".